Քոչարյանի եղբոր աղջկա տարեկան եկամուտը՝ ավելի քան 9 մլն դրամ

Երևանի ավագանու ընտրությունների «Բարգավաճ Հայաստան» կուսակցության ցուցակում ընգրկված՝ նախկին նախագահ Ռոբերտ Քոչարյանի եղբոր դուստրը՝ Իրինա Քոչարյանը, բավականին «հարուստ» պաշտոններ ունի: «Առաջին լրատվական»-ին Կենտրոնական ընտրական հանձնաժողովի կողմից տրամադրված Ի. Քոչարյանի գույքի և եկամուտների հայտարարագրից տեղեկանում ենք, որ նա ԱԺ ԲՀԿ խմբակցության փորձագետ է, «Գալաթեա-Մեդ» ՍՊԸ-ի տնօրեն, «ԱվիաՍերվիս» ՓԲԸ-ի խորհրդի նախագահի խորհրդական, «Վալերի Քոչարյան» բարեգործական հիմնադրամի տնօրեն:

Ի. Քոչարյանը 212 ք/մ մակերեսով բնակարան ունի Երևանի կենտրոնում՝ Չարենցի փողոցում, 2 գրասենյակներ՝ Ե. Քոչարի փողոցում՝ 274.5 ք/մ և 145 ք/մ մակերեսներով, նույն փողոցում նաև տիրապետում է 2 տարածքների՝ 273.9 ք/մ և 155 ք/մ:

Ի. Քոչարյանը վարում է 2012 թ. արտադրության Toyota highlander ավտոմեքենա: Նա հայտարարագրում չի նշել ոչ մի թանկարժեք գույք (8 մլն դրամը գերազանցող), նաև չի նշել բանկում որևէ դրամական միջոց և ոչ մի արժեթուղթ կամ ներդրում:

Ռոբերտ Քոչարյանի զարմուհու տարեկան եկամուտը, ըստ հայտարարագրի, ընդամենը քիչ ավելի է 9 մլն դրամից, որից 3.6 մլն-ը՝ «ԱվիաՍերվիս» ՓԲԸ-ի խորհրդի նախագահի խորհրդականի աշխատավարձն է, 1.183 մլն-ը՝ Աժ-ից ստացած աշխատավարձը, 1.208 մլն-ը՝ «Գալաթեա-Մեդ»-ից, 390 հազ. դրամը՝ բարեգործական հիմնադրամից, իսկ 3 մլն-ը «Տեխնիկա Պլյուս» ՓԲԸ-ից ստացած վարձակալության գումարն է:

Հիշեցնենք, որ Իրինա Քոչարյանը ԲՀԿ ցուցակի 42-րդ հորիզոնականում է: