Ամերիկացի հոգևորականը մտադիր է 3-րդ անգամ հրապարակայնորեն վառել Ղուրանը

Ամերիկացի քարոզիչ Թերի Ջոնսը, ով հայտնի է իր ծայրահեղական հակաիսլամական տրամադրություններով, մտադիր է Ղուրանի պատճենների զանգվածային այրում կազմակերպել՝ ի հիշատակ 2001թ. սեպտեմբերի 11-ի ահաբեկչության. գրում է Washington Times-ը:
«2013թ. սեպտեմբերի 11-ին մենք կվառենք Ղուրանի 2.998 պատճեններ, որպեսզի հիշենք նրանց, ովքեր զոհվեցին այդ օրը իսլամիստների ձեռքով»,-ասված է քարոզիչի ղեկավարած «Վե՛ր կաց, Ամերիկա» կազմակերպության տարածած մամլո հաղորդագրության մեջ:

Ակցիան պլանավորվել է Ֆլորիդա նահանգի Թամպա-Բեյում երեկոյան ժամը 5-ին: Այրվելիք Ղուրանի պատճենների քանակը հավասար է այդ օրը զոհված մարդկանց թվին, նշել է Ջոնսը:

Ջոնսի անունը արդեն հնչել է ամբողջ աշխարհով 2011թ. մարտի 20-ին, երբ նա 50 մարդու ներկայությամբ Ֆլորիդայի եկեղեցիներից մեկում այրեց Ղուրանի պատճեն, ինչը մեծ արձագանք գտավ հանրության մեջ և քննադատություն առաջ բերեց հատկապես մուսուլմանական երկրներում:

2012-ին նա կրկնեց Ղուրանը վառելու իր հանրային փորձը, ինչի արդյունքում արմատական կազմակերպությունների կողմից նրա հասցեին սկսեցին սպառնալիքներ հնչել: Եգիպտոսի դատարանը հեռակա կարգով նրան մահվան դատապարտեց Մուհամմեդ մարգարեի մասին պատմող ծաղրանկար-ֆիլմի նկարահանմանը մասնակցելու համար: