Նոր կազուսներ Մարգարետ Թետչերի մահվան կապակցությամբ. այս անգամ «թաղել» են թագուհի Էլիզաբեթ 2-րդին (տեսանյութ)

Թայվանում CTi Cable հեռուստաընկերության աշխատակիցները Մեծ Բրիտանիայի նախկին վարչապետ Մարգարետ Թետչերի մահվան լուրը հաղորդելիս սխալմամբ էկրանատակի վազող տողով հաղորդել են ոչ ավել, ոչ պակաս Մեծ Բրիտանիայի թագուհի էլիզաբեթ 2-րդի մահվան մասին. գրում է Lifenews-ը:

Այդ պահին հաղորդավարուհին սկսել է իր ցավակցանքները հայտնել Էլիզաբեթ թագուհու հարազատներին և կսկիծ է հայտնել թագուհու՝ կյանքից հեռանալու կապակցությամբ: Դրանից հետո հեռուստաընկերության աշխատակիցներն ուղիղ եթեր են թողել «Անգլիայի թագուհին հեռացավ, մենք կկարոտենք նրան» վազող տողը:

Երբ այդ տեսահոլովակը հայտնվեց համաշխարհային լրատվամիջոցներում, հեռուստաընկերությունը ներողություն խնդրեց և հեռացրեց այդ ցավակցական տողը:

Սակայն սրանով չվերջացան երկաթյա տիկնոջ հետմահու արկածները: Նույն Թայվանում մեկ այլ՝ Channel 5 հեռուստաընկերությունը շփոթել էր Թետչերի լուսանկարը ամերիկացի դերասանուհի Մերիլ Սթրիփի հետ:

Հիշեցնենք, Թվիթերում բառակապակցություն արտահայտող իմաստային նշումի՝ hashtag-ի թյուրըմբռնման պատճառով լուրեր են տարածվել, թե մահացել է հայտնի հայազգի երգչուհի Շերը՝ Շերլին Սարգսյանը. գրում է Wall Street Journal-ը:

Համացանցում Թվիթերի օգտատերերի կողմից Թետչերի մահվան լուրը հայտնվելուց հետո ի հայտ եկավ հետևյալ hashtag-ը՝ նշումը. #nowthatchersdead (Այժմ մահացել է Թետչերը): Սակայն շատ օգտատերեր այն սխալ էին ընկալել և կարդացել էին #nowthatchersdead(Ահա այժմ և Շերը մահացավ), ինչը ցավակցական ուղերձների մեծ ալիք առաջ բերեց երգչուհու ընտանիքին նրա վաղաժամ մահվան կապակցությամբ: