Է. Միրզոյանի անվան լարային քառյակի ստեղծմանը նվիրված միջոցառում

Օրերս, Երևանի Ռուսական արվեստի թանգարանում /պրոֆ. Արամ. Աբրահամյանի հավաքածու/ տեղի է ունեցել հայ անվանի կոմպոզիտոր Էդվարդ Միրզոյանի անվան լարային քառյակի ստեղծմանը նվիրված միջոցառում: Նորաստեղծ խմբին իրենց ողջույնի խոսքն են հղել կոմպոզիտորներ Տիգրան Մանսուրյանը, Լևոն Չաուշյանը, Հայաստանի պետական ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը, Արշակ և Ելենա Միրզոյաններն ու այլք: Ծրագրում հնչել են Ֆրանս Շուբերտի, Էդվարդ Միրզոյանի, Ռուբեն Ալթունյանի ստեղծագործությունները:

Էդվարդ Միրզոյանի անվան լարային քառյակի ստեղծման գաղափարը երիտասարդ հայ երաժիշտների մոտ ծագել էր դեռևս տարիներ առաջ: 2012 թ. փետրվարին «Նոր Ռուսաստան» պետական սիմֆոնիկ նվագախմբի և Հայաստանի պետական սիմֆոնիկ նվագախմբի մենակատարների սերտ համագործակցության արդյունքում այդ հրաշալի գաղափարը կյանքի է կոչվել: Էդվարդ Միրզոյանի անվան լարային քառյակի կազմում ընդգրկված են Արամ Ասատրյանը /ՀՖՆ երկրորդ կոնցերտմեյստեր, «Սերենադ» կամերային նվագախմբի առաջին ջութակ/, Սոնա Ազարյանը /«Նոր Ռուսաստան» ՊՍՆ մենակատար և «Նոր Ռուսաստան» նվագախմբի մենակատարների քառյակի հիմնադիր/, Արմեն Թորոսյանը /ալտ/ և Վահան Գրիգորյանը /թավջութակ/: Է. Միրզոյանի անվան լարային քառյակի երկացանկում ներառված են հայ և օտարազգի կոմպոզիտորների ստեղծագործություններ: Հայ մեծանուն կոմպոզիտոր Էդվարդ Միրզոյանի /1921-2012/ անունը վաղուց ի վեր դասվում է 20–րդ դարի մեծանուն կոմպոզիտորների կողքին: