Հայաստանում նախագահների երդմնակալության արարողությունն ընթանում է ոստիկանական մահակի ներքո

«Հրապարակը» խմբագրականում գրում է. «Երեկ օրվա «հերոսը» կրկին ոստիկաններն էին, ովքեր պարբերաբար մեր երկրում գլխավոր գործող անձինք են դառնում և ուղղորդում քաղաքական պրոցեսները: Եվ դա արվում է այնպես, կարծես հենց դա է մեր ոստիկանների գլխավոր պարտականությունը, այլ ոչ թե երկրում հասարակական կարգի պահպանությունը, հանցագործությունների դեմ պայքարն ու կանխարգելումը:

Այս էլ որերորդ տարին է, որ մեր երկրում նախագահների երդմնակալության արարողությունն ընթանում է ոստիկանական մահակի ներքո և աջակցությամբ: Երեկ ողջ օրը մայրաքաղաքում լսվում էին ոստիկանական շչակների ձայները, բարձրաստիճան ոստիկանները հարցազրույցներ էին տալիս, ցածրաստիճանները՝ սպառնալիքներ հնչեցնում: Օրն առանց պատահարների չանցավ՝ կրկին բախումներ եղան, ծեծվածներ, նվաստացվածներ:

Հենց այս միջադեպերն են պատճառը, որ շատերն ասում են, թե ապրում ենք ոստիկանական երկրում, որտեղ թելադրողը ոչ թե օրենքն է ու Սահմանադրությունը, այլ ոստիկանները, բանակը, ուժը, բռնությունը: Եթե ընտրական իրավունքը չի գործում, պետք է գործի ընտրվողների կամքը՝ սա է կյանքի օրենքը: Ինչպես անել, որ գործեն օրենքները, և պատժվեն օրենքը խախտողները, ահա այն գերնպատակը, որին պետք է հասնի մեր հասարակությունը: Ինչպես անել, որ մարդկանց փոքրաթիվ խումբը չթելադրի իր կամքը, և հաղթի մեծամասնության կամքը: Ահա այն գոյավիճակը, որին ձգտում են աշխարհի բոլոր ժողովուրդները: Որ չստացվի այնպես, ինչպես հիմա Հայաստանում է՝ երբ զենքի ու ոստիկանության ուժին տիրապետող իշխանությունն իրավացի է, իսկ ժողովրդի աջակցությունն ունեցող ընդդիմությունը՝ դատապարտված: Որ իշխանությունը կարգուկանոն հաստատելու անվան տակ բռնություններ չկիրառի, իսկ ընդդիմությունն անապացույց հայտարարություններ չանի, թե ընտրությունները կեղծվել են»: