Ինչ-որ մեկը պե՞տք է պատասխանի Շիրակի մարզի ողբերգական դեպքի համար. Արամ Մանուկյան

Ազգային ժողովի քառօրյայի 3-րդ օրը, ըստ կանոնակարգի, կառավարության հետ հարց ու պատասխանի օրն է:

ՀԱԿ խմբակցության քարտուղար Արամ Մանուկյանի հարցը վերաբերում էր օրեր առաջ Շիրակի մարզում տեղի ունեցած ողբերգական դեպքերին, որի ժամանակ երկու անչափահաս երեխաներ զոհվեցին։

«Թերևս քաղաքական աղմուկի մեջ մի տեսակ ստվերվեց մեծ ողբերգությունը։ Ցանկանում եմ ճշտել` ինչ-որ մեկը պե՞տք է պատասխանի այս դեպքի համար, և կառավարությունը նախատեսո՞ւմ է գոնե հետագա այդպիսի դեպքերը կանխարգելելը, որովհետև այդտեղ դեպքեր լինում են հաճախ»,-հարցրեց Մանուկյանը։

Պաշտպանության նախարար Սեյրան Օհանյանը, պատասխանելով հարցին, ասաց. «ՌԴ-ի 102 ռազմական բազան, որը տեղակայված է ՀՀ-ում, օգտագործում է ՀՀ համապատասխան միջոցները՝ հողերը և այլ շինությունները համապատասխան պայմանագրերի համաձայն։ Ներկայումս ՌԴ 102 բազան ունի երկու ուսումնական դաշտ։ Այդ հողերի օգտագործման համար գոյություն ունեն համապատասխան պայմաններ։ Տվյալ դեպքը, որը տեղի է ունեցել Կանխուտ գյուղի մոտակայքում, ունի 3 կմ լայնությամբ և 9 կմ խորությամբ տարածք, այդ տարածքի համար ՌԴ համապատասխան հրամանատարությունը համապատասխան պայմաններ են ստեղծում առաջին հերթին զգուշացնելու տեղի բնակչությանը, որ այդտեղ տեղի է ունենում հրաձգություններ, կամ տարբեր մարտավարական պարապմունքներ, բացի դրանից, այդ տարածքերը նաև շրջափակված են։ Դեպքը տեղի է ունեցել, որն, իհարկե, մեզ համար ցավալի է, և մենք համապատասխան ցավակցություն արտահայտել ենք։ Այսօր ինձ մոտ են եղել ՌԴ-ի 102 բազայի հին և նոր հրամանատարները, որոնց հետ մենք համագործակցության նոր եզրեր ենք գտել։ Նորից պետք է տեղաբնակչությանը մենք զգուշացնենք, որ այդ տարածքում տեղի են ունենում զորավարժություններ, և այդ զորավարժությունների անցկացման ժամանակ այցելելն այդ տարածքներ արգելվում է։

Դեպքը տեղի է ունեցել այն պատճառով, որ փորձել են երկաթե կամ ալյումինե թափոն հավաքել, և մենք արդյունքը գիտենք, և այսօր և՛ ես, և՛ ՌԴ 102 բազայի հրամանատարությունը որոշում ենք ընդունել նաև համապատասխան աջակցություն ցուցաբերել այդ ընտանիքներին»,- ասաց Սեյրան Օհանյանը։

Արամ Մանուկյանը, արձագանքելով Օհանյանի պատասխանին, ասաց, որ այդ տարածքը ցանկապատված չէ և մեկ արգելափակոց կա, որով այդ տասնյակ կիլոմետրերը ցանկացած մարդ կարող է մտնել։