Սոս Ջանիբեկյանը երկրից գնալու ցանկություն ունի

esyes.am-ն իր ընթերցողներին պատմել է, որ ապրիլի 8-ին Սոս Ջանիբեկյանը նշում էր իր 25-ամյակը: Չնայած Սոսի համար հոբելյանական տարեդարձ էր, նա այն չի նշել: «Առհասարակ մեծ նշանակություն չեմ տալիս տարեդարձը նշելուն և եթե այդ օրը նկարահանում ունենամ, հաստատ չեմ հետաձգի ծնունդս նշելու համար»,- ասաց Սոսն ու հավելեց, որ երեկ էլ է նկարահանումների եղել, ինչից հետո ընկերների հետ գնացել են գարեջուր խմելու: Հետաքրքիր նվերներ և անակնկալներ Սոսն առանձնացնել չցանկացավ, սակայն հիշեց, որ տարիներ առաջ մայրը՝ Աննա Աղասարյանը, իրեն հարյուր շոկոլադ էր նվիրել, ինչն իրեն շատ էր տպավորել:

Դերասանն անդրադարձավ նաև լրատվամիջոցներում տարածված այն լուրերին, որ ինքը սիրած աղջկանից հիսուն պահպանակ է նվեր ստացել. «Ես որոշ լրատվամիջոցների պատմել էի, որ կյանքիս ամենատպավորիչ նվերներից մեկը եղել է տարիներ առաջ, երբ ընկերուհիներիցս մեկն ինձ հիսուն պահպանակ էր նվիրել, սակայն ձևախեղման արդյունքում թյուրիմացաբար կարծիք է ստեղծվել, թե խոսքն այս տարվա մասին է: Ուզում եմ ևս մեկ անգամ շեշտել, որ դա տարիներ առաջվա պատմություն է»:

Սոսից հետաքրքրվեցինք, թե հիմա գործունեության ինչ փուլում է, քանի որ «Եղբայրներ» հեռուստասերիալի ավարտից հետո նրան հեռուստատեսությամբ չենք տեսնում: Նա հայտնեց, որ այժմ նկարահանվում է ռուսական ֆիլմում, որը կոչվում է՝ «Психопат»: Այն հոգեբանական դրամա է, որտեղ Սոսը մարմնավորում է տաքսիստի: Ֆիլմը բաղկացած է չորս մասից, իսկ եթեր կհեռարձակվի Ռուսաստանի Առաջին ալիքով:

Սա Սոս Ջանիբեկյանի՝ ռուսական ֆիլմում նկարահավելու երրորդ փորձն է: Նա նկարահանվել է նաև «Вне закона», «Курортный роман» ֆիլմերում, որոնք շուտով կհեռարձակվեն ռուսական հեռուստաալիքներով. «Շատ շնորհակալ եմ Միշա Պողոսովին, ով մեր հայկական կինոշուկայի համար ճանապարհներ բացեց դեպի դուրս և ինձ ընդգրկեց իր նախագծերից երեքում: Շնորհակալ եմ նաև այն ռեժիսորներին, ովքեր ինձ ընտրեցին այդ ֆիլմերում նկարահանվելու համար' Արման Գևորգյանին, Կարեն Ադամյանին և Ռոման Մուշեղյանին»:
Անդրադառնալով ռուսական և հայկական ֆիլմերի տարբերությանը՝ Սոսը նշեց, որ ռուսականները տեխնիկական և ֆինանսական առավելություններ ունեն. «Բնականաբար ռուսական և հայկական կինեմատոգրաֆիայի տարբերությունը Հոլիվուդի և Հայաստանի տարբերությունը չէ, սակայն կարող եմ նշել, որ այնտեղ լավ մասնագետներ ավելի շատ կան և թե՛ ֆինանսի, թե՛ հնարավորության առումով ավելի շատ տեղ է տրվում կինոարտադրությանը: Տարբերությունը պրոֆեսիոնալներին տեղ և հնարավորություն տալն է, տեխնիկապես զարգացած լինելը և ավելի մեծ տարածում ունենալու ճանապարհները»:

Սոս Ջանիբեկյանը հայտնեց, որ արտերկրում գործունեություն ծավալելու նպատակ ունի և esyes.am-ի հետ անկեղծ խոսեց պատճառների մասին: «Այժմ նպատակներիցս մեկն է արտերկրում գործունեություն ծավալելը: Չեմ ուզում վիրավորված հնչի, որովհետև ինձ համար ամեն դեպքում շատ լավ է, սակայն մեզ մոտ սերիալաներից բացի գաղարվեստական ֆիլմեր գրեթե չեն նկարահանվում: Եթե նկարահանվում են, դա նկարահանում են, օրինակ, երեք հոգի, ովքեր գտել են ինչ-որ դերասանների ու բոլոր ֆիլմերում նրանց են ընդգրկում: Շատ մեծ ուրախությամբ հիմա խաղում եմ դրսի հետ համատեղ նկարահանվող ֆիլմերում: Դա ավելի լավ է, քան էստեղ նստեմ, սպասեմ՝ ով ինչ խոստում կտա, հետո կխաբի ու չի կատարի, կամ կխաբի, հետո խոստում կտա և այդ հույսով ապրեմ: Ես՝ որպես մարդ և դերասան ցանկանում եմ անընդհատ գործել արվեստում։

Դրսում ապրող շատ հայ մեծերի կյանքն ուսումնասիրելով հասկացել եմ, որ նրանք հայրենիքում գնահատված չեն եղել մինչ դուրս գնալն ու այնտեղ մեծ հաջողություների հասնելը, կայանալը: Ես հասկացել եմ, որ որպեսզի քեզ քո հայրենիքում սիրեն ու գնահատեն, ցավոք, պետք է դրսում կայանաս: Եթե մի լուրջ ռուսական կամ արտասահմանյան ֆիլմում ես նկարահանվում, բոլորն ասում են՝ տեսնում ես, լուրջ ֆիլմում է նկարահանվել, թեև երբ այստեղ էիր, նույնն էիր: Այնտեղ նկարահանվելով ո՛չ տաղանդդ, ո՛չ շնորհքդ, ո՛չ խարիզմադ չի ավելանում: Ցավոք, Հայաստանի խնդիրներից մեկն էլ այն է, որ դրսում կայանալը չափանիշ է: Քանի դեռ տաղանդավոր մարդիկ այստեղ են և չեն բռնել դուրս գալու ճանապարհը, պետք է գնահատել և չկորցնել նրանց:

Սոսն այժմ սերիալներում չի նկարահանվում: Դերասանը նշեց, որ այս պահին ցանկություն էլ չունի: «Հիմա մեզ մոտ կարճ սերիալներ նկարահանելու միտում է նկատվում: Ես այդ մասին խոսում էի դեռ երկու տարի առաջ ու իմ ղեկավարներին և ռեժիսորներին առաջարկում նկարահանել այդպիսի սերիալներ: Վերջերս նկարահանվեց 25 սերիայով ֆիլմ, որտեղ ես չնկարվեցի, քանի որ այդ շրջանում նկարահանավում էի «Եղբայրներում»: Հիմա ես սպասում եմ, տեսնենք»,- նշեց Սոս Ջանիբեկյանը: