«Բավարիան» և «Բարսելոնան» միացան «Ռեալին» և «Բորուսիային» (տեսանյութ)

Ավարտվեցին Չեմպիոնների լիգայի այս մրցաշրջանի քառորդ եզրափակիչ հանդիպումները: Հայտնի դարձան կիսաեզրափակչի բոլոր մասնակիցները։

Կատալոնական «Բարսելոնան» սեփական հարկի տակ 1:1 հաշվով ավարտեց հանդիպումը «ՊՍԺ»-ի հետ:

Հանդիպման հաշիվը բացվեց միայն երկրորդ խաղակեսում։ 50-րդ րոպեին հյուրերի կազմում աչքի ընկավ Պաստորեն։ Դաշտի տերերից գոլային հավասարության հասնելու համար պահանջվեց 21 րոպե։ Գոլն իր հաշվին գրանցեց Պեդրո Ռոդրիգեսը:

Թիմերի միջև առաջին հանդիպումն ավարտվել էր 2:2 հաշվով և մրցակցի հարկի տակ ավելի շատ գոլ խփելու շնորհիվ՝ կատալոնյան ակումբը դուրս եկավ կիսաեզրափակիչ փուլ:

Օրվա մյուս խաղում Մյունխենի «Բավարիա»–ն կրկին ապացուցեց իր առավելությունը Թուրինի «Յուվենտուսի» նկատմամբ:

Իտալական ակումբի հարկի տակ Մյունխենի թիմը հաղթեց 2:0 հաշվով։ Առաջին գոլը 64-րդ րոպեին հեղինակեց Մանջուկիչը, իսկ երկրորդը հանդիպման վերջին րոպեին իր հաշվին գրանցեց Պիսարոն։

Նշենք, որ թիմերի միջև առաջին հանդիպումը ևս ավարտվել էր 2:0 հաշվով՝ հօգուտ «Բավարիայի»:

Արդյունքում կիսաեզրափակիչ փուլում իսպանական երկու ակումբները կպայքարեն 2 գերմանականների դեմ: