«Հրապարակ». Կառավարությունը «էշից ընկած» էր

Երեկ խորհրդարանական հարցուպատասխանի եկած կառավարությունը, ինչպես ժողովուրդն է ասում՝ «էշից ընկած» էր. լրագրող տեսնելով, նախարարները «մարշ-բրասոկի» էին դիմում: Իսկ լրագրողներին մի հարց էր հետաքրքրում՝ մնալո՞ւ եք ձեր պոստում, թե՞ ոչ: Ոչ մեկը կարծիք չուներ:

«Հրապարակի» տեղեկություններով՝ նրանցից որևէ մեկի հետ ոչ ոք չի խոսել, բոլորն էլ սպասողական վիճակում են: Տեսակետ կա, որ կառավարության վերջնական կազմը հայտնի կլինի ավագանու ընտրություններից հետո: Ավելին՝ խորհրդարանի միջանցքներում երեկ ՀՀԿ-ականները տեսակետ էին հնչեցնում, որ հնարավոր է՝ նույնիսկ նոր կառավարությունը ծրագիրը բերի, իրենք չհաստատեն՝ ժամանակ շահեն, մինչև ավագանու ընտրություններից հետո քաղաքական դասավորությունը վերջնականապես պարզ դառնա, ու կառավարության կազմը նշանակվի:

Նախորդ օրը «Հրապարակը» հարց ուղղեց Պետեկամուտների կոմիտեի նախագահ Գագիկ Խաչատրյանին՝ մնալո՞ւ եք Ձեր պոստում: «Չգիտեմ, ոչինչ չգիտեմ»,- ասաց նա: «Բայց Ձեր աչքերի մեջ ներքին անորոշություն ու տագնապ կա՝ ապագայի հետ կապված»: «Իսկ Ձեր աչքերի մեջ Ձեր հնչեցրած հարցերի պատասխանը կա կարծես»,- իրեն չկորցնելով՝ հակադարձեց Գ. Խաչատրյանը: