«Ապրիլի 9-ի միակ թերացումը, կամ իշխանությունը պատրաստ է նոր Մարտի 1-ի»

Ապրիլի 9-ին Հայաստանում տեղի ունեցած նախագահական ընտրություններում պաշտոնական տվյալներով առաջին տեղը զբաղեցրած Սերժ Սարգսյանը և երկրորդ տեղը զբաղեցրած Րաֆֆի Հովհաննիսյանը երդվեցին։

Սերժ Սարգսյանը երդվեց Կարեն Դեմիրճյանի անվան Մարզահամերգային համալիրում՝ Ազգային ժողովի հատուկ նիստի ժամանակ, հատուկ հրավիրված հյուրերի առջև, իսկ Րաֆֆի Հովհաննիսյանը՝ Ազատության հրապարակում, ՀՀ քաղաքացիների առջև։

Ժամը 12-ի Րաֆֆի Հովհաննիսյանի երդման արարողությունից հետո վերջինս Ազատության հրապարակում հավաքվածներին կոչ արեց հեռանալ և վերադառնալ երեկոյան վեցին: Այնուհետև Ազատության հրապարակում Հովհաննիսյանը հայտարարեց խաղաղ երթով գնալ դեպի Ծիծեռնակաբերդ, իսկ Ազատության հրապարակում հավաքվել ապրիլի 12-ին:

Հովհաննիսյանի այս կոչին հավաքվածները արձագանքեցին սուլոցներով և պահանջեցին, որ երթն անցնի Բաղրամյան փողոցով: Րաֆֆի Հովհաննիսյանն ընդունեց առաջարկը:

Ցույցի հազարավոր մասնակիցները երթով շարժվեցին դեպի Բաղրամյան 26՝ նախագահական նստավայր: Սակայն Բաղրամյան պողոտայում ռետինե մահակներով և վահաններով զինված ոստիկանները մի քանի շարքով փակել էին Բաղրամյան պողոտան և խոչընդոտում էին ցույցի մասնակիցների երթը դեպի նախագահական նստավայր: 

Պողոտայում եղավ ընդհարում ցույցի մասնակցիների և ոստիկանության միջև, ոստիկանները հարվածեցին և վնասեցին նաև «Ժառանգություն» կուսակցության ներկայացուցիչ Արմեն Մարտիրոսյանին:

Լարված իրավիճակը Բաղրամյան պողոտայում շարունակվեց մի քանի ժամ: Այդ ընթացքում պարզվեց, որ Րաֆֆի Հովհաննիսյանը ՀՀ ոստիկանապետ Վլադիմիր Գասպարյանի ուղեկցությամբ, հարյուրավոր համակիրների հետ երթով շարժվում է դեպի Ծիծեռնակաբերդ:

Դեպի Ծիծեռնակաբերդ երթին չէին միացել հարյուրավոր քաղաքացիներ, ոմանք տեղյակ չէին երթից, ոմանք էլ դեմ էին:

Մինչ Րաֆֆի Հովհաննիսյանը Վլադիմիր Գասպարյանի հետ աղոթում էր Ծիծեռնակաբերդում, Բաղրամյան պողոտայում ոստիկանները սպառնում էին ուժի կիրառմամբ՝ օրենքի սահմաններում, ցրել երթը, ձերբակալվեց մի քանի ակտիվիստ: Ավելի ուշ Ծիծեռնակաբերդից եկավ Րաֆֆի Հովհաննիսյանը, բանակցեց ոստիկանապետի հետ, պողոտան բացվեց, ցուցարարները խաղաղ երթով բարձրացան նախագահական, հետո երթն ավարտեցին Ազատության հրապարակւոմ:

Այն, ինչ տեղի ուենցավ ապրիլի 9-ին, լուրջ քննադատությունների ալիք բարձրացրեց հատկապես ֆեյսբուք սոցցանցում:

Ապրիլի 9-ին տեղի ունեցած իրադարձությունների մասին Լուրեր.com-ը զրուցեց «Ժողովրդավարական հայրենիք» կուսակցության նախագահ Պետրոս Մակեյանի հետ:

Վերջինս նշեց, որ իր պատկերացումները մի քիչ այլ են հրապարակում հավաքված ժողովրդի պատկերացումներից ու սպասելիքներից:

«Փորձեմ համատեղել: Ապրիլի 9-ին հրապարակում հավաքված ժողովուրդը մեծ սպասելիքներ ուներ՝ օր առաջ ազատվել վարչախմբից: Դա բոլորիս սպասելիքն է, բայց կար մի զանգված, որը դա ուզում էր տեսնել հենց նույն օրը՝ ապրիլի 9-ին: Բայց քաղաքական ուժերը, գործիչները, այդ թվում՝ և ես հասկանում էինք, որ ապրիլի 9-ին հրաշք չի լինելու, բայց գործընթացներ լինելու են: Գործընթացներից կարելի էր պատկերացնել մինիմում, մաքսիմում ծրագիր: Իմ պատկերացմամբ՝ ապրիլի 9-ին եղավ չարյաց փոքրագույնը: Ժողովուրդը տարիներ շարունակ, երևի՝ մի 7-8 տարի, Բաղրամյան պողոտայի ուղղությամբ երթ չէր եղել: Այդ օրը հրապարակի ճնշմամբ Րաֆֆին ուղորդեց ցույցի մասնակիցներին դեպի Բաղրամյան, բայց իշխանությունը գործեց ոչ համարժեք: Այդ մեծաքանակ զինուժը, ոստիկանությունը, ոստիկանության համազգեստով, հնարավոր է, այլ ուժային կառույցների ներկայությունը, ցուցարարների հանդեպ ոչ համարժեք վերաբերմունքը, մասնավորապես՝ Արմեն Մարտիրոսյանի հանդեպ գազանությունը.... կարծում եմ՝ իշխանությունը սարսափած է:

Երթը ցույց տվեց նրանց վախի չափը: Այդ օրվա տեխնիկական թերացումն այն էր, որ ընդդիմությունը կազմակերպված չէր»,- ասաց Մակեյանը:

Վերջինս նշեց նաև, որ հիմնական սխալը ապրիլի 9-ին Րաֆֆի Հովհաննիսյանի՝ Ծիծեռանակաբերդ գնալն էր:

«Մենք սկզբում գիտեինք, թե Րաֆֆի Հովհաննիսյանը բանակցում է Վլադիմիր Գասպարյանի հետ, բայց ավելի ուշ հասկացանք, որ երթ է տեղի ունենում, որն էլ ուղեկցում է ոստիկանապետը: Րաֆֆի Հովհաննիսյանն ավելի ուշ ասաց, որ ինքը մտածում էր, թե ամբողջ ժողովուրդն է իր ետևից գնում, բայց տեխնիկապես դա հնարավոր չէր, որովհետև մենք չենք էլ իմացել երթի մասին:

Մեծ հաշվով՝ միակ թերացումը կամ սխալը այդ օրվա, իմ կարծիքով, երթն էր դեպի Ծիծեռնակաբերդ: Իսկ առհասարակ, կարծում եմ՝ սա լուրջ փորձություն էր իշխանության համար: Իշխանությունը, ցավոք սրտի, պատրաստ է իրենց փող աշխատելու մոլուցքի կամ ունեցվածքը կորցնելու մոլուցքի տակ նույնիսկ հազարավոր զոհեր տալ:

Նրանք պատրաստ են ոչ միայն Մարտի 1-ը կրկնել, այլև ավելիին են ունակ: Մեծ հաշվով՝ ոչ մի բան չի փոխվել, դասեր չեն քաղել, և սա հիմնավորում է նաև նրանով, որ Մարտի 1-ի պատասխանատուները՝ դիմահար կրակողները մինչև այսօր չեն պատժվել: Այսինքն՝ սա նշանակում է, որ այդ մարդկանց նորից օգտագործելու խնդիր ունեն»,- ասաց Մակեյանը:

Հարցին, թե ինչ զարգացումներ է ակնկալում, վերջինս ասաց, որ ըստ իրեն՝ պայքարը շարունակվելու է:

«Կարծում եմ՝ պայքարը շարունակվելու է: Իսկ աջից-ձախից Րաֆֆի Հովհաննիսյանի վրա, հատկապես՝ ընդդիմադիր երևացող մարդկանց ֆեյսբուքյան հարձակումները, պետք է դադարեցնել: Նրանք մոռանում են նաև, որ տարիներ շարունակ Բաղրամյանի կողքով չէին անցնում, հիմա Րաֆֆի Հովհաննիսյանը տարավ Բաղրամյան, թե ինչ արդյունք ունեցավ, արդյունքը դեռ չկա, դեռ վաղ է գնահատել, բայց այդ երթը Բաղրամյանով նստվածք կունենա:

Իշխանությունը տեսավ, որ ժողովուրդը պատրաստ է, և եթե Րաֆֆին հրահանգ տար, որ պետք է անցնել, կանցնեին այդ պատնեշը, բայց դա կլիներ շատ ծանր գին:

Կարծում եմ՝ շատ բան չի փոխվել, ժողովուրդը ավելի վստահ է, ուղղակի այդ վայրահաչները պետք է դադարեն Րաֆֆիին «հարվածել», իսկ դա էլ կդադարի միայն արդյունքի դեպքում: Կարծես նրանք սպասում էին ինչ-որ տոնախմբության՝ ապրիի 9-ին ինչ-որ սայթաքում լինի, ու իրենք սկսեն ուրախանալ»,- եզրափակեց Մակեյանը:

Գայանե Համբարձումյան