Նունե Եսայանն ինչի՞ ավելի պակաս անուն է, որ Շուշան Պետրոսյանն օգնի. երգչուհին` իրեն տրված տարածքի մասին

Կառավարության տրամադրած տարածքում «Նունե Եսայան» բարեգործական հասարակական կազմակերպության կողմից ուսումնական կենտրոնը կստեղծվի մինչեւ տարեվերջ: Այս մասին NEWS.am-ի թղթակցի հետ զրույցում ասաց երգչուհի Նունե Եսայանը:

Նա նշեց, որ նախեւառաջ այդտեղ որոշակի վերանորոգման աշխատանքներ կկատարեն, կահույք կբերվի: Նունե Եսայանը վստահ է, որ շատ կազմակերպություններ կաջակցեն իրենց: «Ուրախ ենք, որ այդ տարածքը տրվեց մեզ: Իմիջայլոց, այդ տարածքը մեզնից 10 տարի առաջ տրամադրվել է Նանի Օսկանյանին, ով նույն գործունեությամբ է զբաղվել, իսկ հիմա նույն ձեւով, քանի որ դա արդեն փորձված տարբերակ էր, ինքն անցյալ տարվանից հրաժարվել էր, մենք ուղղակի փոխարինեցինք, այժմ մեզ է տրամադրվել»,- ասաց նա:

Երգչուհին պարզաբանեց, որ 1,5 տարի սպասում էին դրան, թղթաբանությամբ էին զբաղված, եւ այժմ շատ ուրախ են, որ իրականացավ: Նունե Եսայանը հավաստեց, որ իրենց կենտրոնում ամեն ինչ անվճար է լինելու, քանի որ կենտրոնը բարեգործական է: Տարիքային սահմանափակում եւս չի լինելու, տաղանդավոր երեխաները կարող են դիմել եւ անվճար պարապմունքների մասնակցել մի շարք ուղղություններով: Բարեգործական գործունեությունը չի խանգարի նրա երգարվեստին, այդ ուսումնական կենտրոնով զբաղվող թիմ կա, որն ինքն է ղեկավարում:

Անդրադառնալով տարածված տեղեկություններին, թե կենտրոնի համար տարածք տրամադրելու հարցում նրան օգնել է երգչուհի, ԱԺ պատգամավոր Շուշան Պետրոսյանը, Նունե Եսայանը նշեց, որ «Շուշան Պետրոսյանը նույնիսկ տեղյակ չի այս ամեն ինչի մասին, որ լսի էլ, կզարմանա»: «Եւ այստեղ օգնելու ի՞նչ կա, Նունե Եսայանն ինչի ավելի պակա՞ս անուն է, որ Շուշան Պետրոսյանը օգնի»,-ասաց երգչուհին:

Ավելի վաղ NEWS.am-ը հայտնել էր, որ «Նունե Եսայան» բարեգործական հասարակական կազմակերպությունը 10 տարի ժամկետով անհատույց ստացել է Երեւանի Տիգրան Մեծ 26ա հասցեում գտնվող 53 դպրոցի երրորդ հարկը՝ 487.5 քառ. մետր տարածքով: Համապատասխան որոշման նախագիծն ընդգրկված էր ՀՀ կառավարության ապրիլի 11-ի նիստի օրակարգում:

«Նունե Եսայան» բարեգործական կազմակերպության կողմից ներկայացված ծրագրի համաձայն՝ կազմակերպությունը նպատակ ունի հիմնել ուսումնական կենտրոն, որտեղ կգործեն անվճար հայոց լեզվի, մաթեմատիկայի, օտար լեզվի, երգի, պարի եւ համակարգչային դասընթացների խմբակներ: Կենտրոնը երեխաներին կընձեռի նաեւ տարբեր արհեստներ սովորելու, մշակութային օջախներ այցելելու, անվանի մարդկանց հյուրընկալելու եւ ամառային արձակուրդները ճամբարներում անցկացնելու հնարավորություն: