Հայ ճանաչվածների հայրիկները

Պարզվում է՝ միայն կանայք ու մայրերը չեն, որ տարվա մեջ գոնե մեկ օր նշում են իրենց տոնը: Այս առումով առաջին հայացքից անուշադրության մատնված հայրիկներն էլ հատուկ իրենց համար սահմանված միջազգային օր ունեն, որից, սակայն, իրենք էլ տեղյակ չեն: Սա ամենևին էլ կատակ չէ. նոյմբերի 7-ը՝ որպես Հայրիկների միջազգային օր նշելու կսմ հիշատակելու ավանդույթ դեռևս ձևավորված չէ ու մեր հայրերից շատերն էլ այս օրը գիտեն որպես խորհրդային Մեծ հեղափոխության օր:

Դե, ինչ, հայրիկներ, շնորհավոր ձեր օրը, որը, հուսով ենք, էլ երբեք չեք մոռանա :) Հենց օրվա կապակցությամբ էլ առաջին անգամ esyes.am-ը անդրադառնում է հայտնիներից մի քանիսի հայրիկներին:

Ալեքսան Արզումանյան

Պետական ճարտարագիտական համալսարանի՝ Գյումրու մասնաճյուղի դեկան Ալեքսան Արզումանյանը մեզ շատ հայտնի հումորիստ, «Կարգին» ընկերության հիմնադիրներից Մկոյի հայրն է: Քանի որ պարոն Ալեքսանը տեղյակ չէր տոնից, նշանակում է՝ այդ օրը երբևէ նվեր չի ստացել հայտնի տղայից: Դրա փոխարեն Մկոն իր հայրիկին նվերներ է մատուցում հիմնականում ծննդյան տարեդարձներին: Դեկան հայրը շատ լավ է վերաբերվում հումորիստ որդու գործունեությանը, քանի որ ուսանողական տարիներից էլ նա խաղացել է ուսանողական «ՈւՀԱ»-ում: «Ասեմ, որ եթե Մկոն շարունակեր իր մասնագիտությամբ (նա ավարտել է նույն բուհի Քարհատ համակարգեր ֆակուլտետը-հեղ.), նույնպես մեծ հաջողություններ կունենար, սակայն երբ ընտրեց հումորիստի ուղին, ես ոչ մի սահմանափակում չդրեցի, թողեցի որ նա ճախրի, քանի որ իրեն դուր է գալիս իր զբաղմունքը»,- հպարտությամբ ասաց Մկոյի հայրը՝ պարոն Ալեքսանը: Հայտնի հումորիստի հայրը նշում է, որ Մկոն զբաղվածության պատճառով հաճախ չի լինում Գյումրիում՝ հայրական տանը: «Ավելի հաճախ մենք ենք Երևան՝ Մկոյենց տուն գալիս՝ թոռնիկներիս տեսնելու,- նշեց Մկոյի հայրն ու ավելացրեց,- շատ հպարտ եմ, որ այսպիսի տղա ունեմ. ինձ արդեն ավելի շատ ճանաչում են ոչ միայն իմ արած աշխատանքով, այլև իմ տղայով: Հանդիպումների ժամանակ էլ տղայիս հետ խոսում ենք իր գործերից, շոու-բիզնեսի նորություններից»:

Հենրիկ Պետրոսյան

Արտակարգ իրավիճակների նախարարությունում որպես գլխավոր մասնագետ աշխատող Հենրիկ Պետրոսյանը երգչուհի Սուսաննա Պետրոսյանի հայրն է: Երգչուհու հայրիկից հետաքրքրվեցինք Սուսաննայի մասնագիտական ընտրությունից: «Երբ նա «Սուպերսթար» գնաց, մենք շատ վատ էինք տրամադրված. ասում էինք՝ ինչ գործ ունես, դա քո տեղը չէ: Այժմ էլ նա շոու-բիզնեսի մեջ չէ, պարզապես երգում է,- ասաց Սուսաննայի հայրը և ավելացրեց,- աղջիկը մայր լինելու համար է ստեղծված: Այժմ էլ չեմ երազում, որ նա փայլի բեմում կամ նման մի բան: Կարծում եմ՝ նա պետք է խումբ հավաքի և աշխատի երեխաների հետ, ինչպես այժմ աշխատում է Երաժշտական և պարային քոլեջում»: Պարոն Հենրիկը տեղյակ չէր հայրիկների տոնից, բայց վերջերս Սուսաննայից մի փոքրիկ նվեր է ստացել, որը երգչուհին բերել էր Թեհրանում ունեցած համերգներից հետո: Այն հարցին՝ արդյոք հայր և աղջիկ հաճախ են զրուցում, կիսվում միմյանց հետ, պարոն Հենրիկը պատասխանեց. «Այո, շատ հաճախ, օրինակ՝ վերջին անգամ կես ժամ առաջ ենք խոսել՚:

Կառլոս Մարտիրոսյան

Երգչուհի Անի Քրիստիի հայրը՝ մասնագիտությամբ դերասան Կառլոս Մարտիրոսյանը, մեր զրուցակիցներից միակն էր, ով տեղյակ է աշխարհում նշվող Հայրիկների միջազգային օրվա մասին: Երգչուհու հոր խոսքերով՝ Անին հաճախ է նվերներ մատուցում նույնիսկ առանց առիթի: «Աշխատանքից վերադառնալիս հնարավոր է գրասեղանիս ինչ-որ նոր, փոքրիկ նվեր գտնեմ, որն ինձ շատ է ուրախացնում»,- ասաց Անիի հայրը: Հետաքրքրվեցինք նաև, թե ինչպես է վերաբերվել պարոն Կառլոսը դստեր երգչուհի դառնալուն: «Ճիշտն ասած, այնքան էլ համաձայն չէի, բայց առաջին անգամ Անիին բեմում տեսնելով՝ հասկացա, որ նա լուրջ աշխատանքով է զբաղվում, ինչն ինձ սփոփեց: Այժմ հպարտ եմ, որ ունեմ այսպիսի դստրիկ: Անիի մայրը՝ լինելով երաժիշտ, ջութակահար, միշտ էլ օգնել է նրան: Չլինելով մեծ գումարների տեր՝ մենք ամեն ինչ արել ենք մեր բալիկի համար, որպեսզի նա զգա մեր աջակցությունն ու լինի ուժեղ»,- անկեղծորեն նկատեց երգչուհու հայրը: Նրա խոսքերով՝ Անին հուզական, բռնկվող, բայց միաժամանակ բարի անձնավորություն է, ով կարող է հայրիկի հետ խոսել նույնիսկ անձնականից: Երգչուհին այժմ ԱՄՆ-ում բնակվում է հոր հետ: «Էստեղ ես նրան ունեմ, նա էլ՝ ինձ: Մենք մի հարկի տակ ապրում ենք խաղաղ ու սիրով»,- ասաց Անիի հայրը:

Գագիկ Գրիգորյան

Երգիչ Արսեն Գրիգորյանի հայրը՝ Գագիկ Գրիգորյանը, աշխատում է Արտակարգ իրավիճակների նախարարությունում՝ որպես վարորդ: Մասնագիտությամբ երաժիշտ Գագիկը շատ ուրախ է, որ իր երեք տղաներից մեծը՝ Արսենը, ժառանգել է իր երաժշտական գեները: Երգչի հոր խոսքերով՝ Արսենը ցանկացած երգ գրելուց հետո առաջինն իրեն է ցույց տալիս: Ժամանակ առ ժամանակ՝ առիթի դեպքում, պրն Գագիկը որդու հետ երգում էլ է. նրանք նույնիսկ միասին երգ ունեն. «Դա կցուցաներ» երգը Արսենը հոր հետ կատարել է «Բենեֆիս» հաղորդման շրջանակներում: Պարոն Գագիկը ընդգծեց, որ տղայից՝ Արսենից, ընդամենը 21 տարով է մեծ, ինչը հնարավորություն է տալիս լինել ընկերներ, եղբայրներ: Վերջին անգամ պարոն Գագիկը Արսենին մի առիթով խորհուրդ է տվել՝ ասելով. «Տղա ջան, բոլորին մի արշինով մի չափիր, այժմ այլ կերպ պետք է նայես կյանքին»: Տարիներ առաջ՝ դեկտեմբերի 31-ին, երգիչը մեծ անակնկալ է մատուցել հորը: «Այդ օրը եկավ մեր տուն, բոլորին նվերներ տվեց, իսկ ինձ խնդրեց, որ պատշգամբից դուրս նայեմ: Նա ինձ համար իսպանական մակնիշի ավտոմեքենա էր գնել, որը այժմ էլ վարում եմ»,- ուրախությամբ պատմեց երգչի հայրը:

{gallery}1199{/gallery}