Բողոքի ակցիա՝ ՀՀԿ կենտրոնական շենքի մոտ (տեսանյութ)

ՀՀԿ ԳՄ նիստին զուգահեռ քիչ առաջ ՀՀԿ կենտրոնական շենքի հանրևանությամբ Երևանի 33-րդ թաղամասի բնակիչները բողոքի ակցիա էին իրականացնում։

Բնակիչները պահանջում են, որպեսզի իրենց հատկացվեն խոստացված բնակարանները. «5 տարի առաջ բնակարանի պայմանագիր ենք կապել քաղաքապետարանի և «Գլենդել Հիլզ» ընկերության հետ։ 3,5 տարին լրանալուց հետո մեզ կանչել են նոր պայմանագիր կապելու համար, Գինու գործարանի հարակից տարածքում բնակարան ստանալու համար։ Բայց Գինու գործարանում պատրաստի տներ կան, դա իրենց վաճառքի տներն են և կարող են լրիվ ապահովել ժողովրդին, բնակիչներին։ Հիմա նորից կանչում են պայմանագիրը վերակնքելու, բայց ինչքան կարող ենք սպասել։ Հինգ տարի առաջ կառավարության որոշմամբ 33-րդ թաղամասի տարածքը ճանաչվել է գերակա շահ և օտարվել»,- «Ա1+»-ի հետ զրույցում նշեց Նարինե Հարությունյանը։

Բնակիչներին մոտեցավ Երևանի քաղաքապետարանի աշխատակազմի ղեկավարի տեղակալ Արթուր Կարապետյանը և խոստացավ, որ վաղը ժամը 11-ին բնակիչների հետ կհավաքվեն «Սիթի Սենթր Դիվելոփմընթ» ընկերության մոտ։

«Մենք մեծ հույս ու հավատով ենք էս ընկերության նկատմամբ, որ իր պայմանագրային պարտավորությունը կկատարի, համաձայնագիրը կփոփոխվի՝ կկատարվի։ Այս անգամ միանշանակ կատարվելու է։ Հիմա ընդամենը դուք պետք է համաձայնություն տաք՝ Գինու գործարանի կողքը կառուցվող շենքերը տեղափոխվելու»,-ասաց Արթուր Կարապետյանը։

Մեկ շաբաթ առաջ բնակիչները ՀՀԿ կենտրոնական շտաբի դիմաց հանդիպել են ԱԺ նախագահ Հովիկ Աբրահամյանի հետ, ում նամակ են հանձնել՝ իրենց պահանջներով։

«Պարոն Աբրահամյանը խոստացավ նամակը հանձնել պարոն նախագահին՝ հարցին ընթացք տալու համար։ Բայց խոստումը կարծես չի կատարել, որովհետև չի մոտեցել, չի ասել՝ հանձնել են, թե չեն հանձնել նամակը, ինչ ընթացք է տրվել գործին։ Այսօր ոչ մեկ չի մոտեցել»,-ասաց Նարինե Հարությունյանը։

Բնակիչներին ոստիկանները թույլ չէին տալիս մոտենալ ՀՀԿ շենքին։ ԳՄ նիստին մասնակցում էր նաև Սերժ Սարգսյանը։