«Ազգ». Ի՞նչ կտա Մարտի 1-ի դեպքերով Ազգային ժողովի նոր ժամանակավոր հանձնաժողովը

Երեկ ընդհատվեց ՀԱԿ պատգամավորների նախաձեռնած մարտի 1-ի դեպքերով Ազգային ժողովի մի նոր ժամանակավոր հանձնաժողով ստեղծելու հարցի քննարկումը խորհրդարանում եւ կշարունակվի հաջորդ քառօրյայում: Ազգային ժողովի նախագահ Հովիկ Աբրահամյանը նիստի ավարտին դիմեց հիմնական զեկուցող Գագիկ Ջհանգիրյանին' առաջարկելով մի փոքր զիջումների գնալ, մի փոքր էլ կզիջի մեծամասնությունը, որ այդ հանձնաժողովը ստեղծվի ու աշխատի: Հանձնաժողովի ստեղծմանը դեմ էին Մարգարիտ Եսայանը, Կորյուն Նահապետյանը, Սուքիաս Ավետիսյանը, Տաճատ Վարդապետյանը: ԲՀԿ-ից Նաիրա Զոհրաբյանն ու ՀՅԴ-ից Արծվիկ Մինասյանը կողմ էին, քանի որ մարտի 1-ի 10 զոհերի մահվան հանգամանքները մինչեւ հիմա բացահայտված չեն եւ, առհասարակ, շատ հարցականներ են մնացել այդ դեպքերի հետ կապված: Նույն կարծիքին էր նաեւ առաջարկը հիմնավորող Գագիկ Ջհանգիրյանը , նշելով, որ մոտ ութ տասնյակ դատապարված է եղել այդ գործով, սակայն, միեւնույն է, սպանության հանցագործությունները կատարողները չեն հայտնաբերվել եւ չեն դատապարտվել: Նոր ստեղծվելիք հանձնաժողովը 10 անձի սպանության դեպքերով ՀՀ ոստիկանության, գլխավոր դատախազության, հատուկ քննչական ծառայության գործողությունների եւ որոշումների օրինականության հարցի ուսումնասիրման շրջանակում է մնալու, քանի որ բուն սպանության հանցագործություններից ոչ մեկը բացահայտված չէ, հարյուրավոր հանցագործներ մնացել են անպատիժ, չնայած վարույթները դեռ կասեցված չեն: Նաեւ զոհվածների հարազատները չեն օգտվել դատական պաշտպանությունից եւ փոխհատուցում չեն ստացել: Նախորդ հանձնաժողովն ու նրա եզրակացությունն այդպես էլ չարժանացան հարազատների եւ հասարակության վստահությանը: Հանձնաժողովը կազմելու սկզբունքը նման է լինելու էթիկայի հանձնաժողովը կազմավորելու մոտեցմանը' ՀՀԿ-ն կունենա 2 անդամ, մյուսները' մեկական, սա ապահովելու է ընդդիմություն -իշխանություն բալանսը, ինչպես նաեւ այլընտրանք ներկայացող ուժին եւս հնարավորություն է տալու մասնակցելու հանձնաժողովի աշխատանքին:

Սակայն խորհրդարանական մեծամասնության պահվածքը հուշում էր, որ այս հանձնաժողովի ստեղծումը գուցե չկայանա, չնայած Հովիկ Աբրահամյանի' փոխզիջման գնալու առաջարկին: ՀՀԿ-ականները կրքով դեմ էին արտահայտվում այս առաջարկին: Օրինակ' Մարգարիտ Եսայանն ասաց, թե իր համար անհասկանալի է նոր հանձնաժողովի ստեղծումը. «Մենք կարող ենք բարոյական լուծում տալ, արդյոք զոհերի հարազատները բարոյական լուծո՞ւմ են ուզում, եթե այդ նոր հանձնաժողովով լավամարդ եք լինելու զոհերի հարազատների մոտ' կներեք, ես այդ խաղում չկամ», ասաց նա:

Բոլորը' ե՛ւ ՀՀԿ-ականները, ե՛ւ մյուսները, խոսում էին հարցը չքաղաքականացնելու անհրաժեշտությունից: Մյուս քառօրյայում միայն հարցի քվեարկությունը կկայանա: