«ՀԺ». Ինչ կասի Րաֆֆին այսօր

Երեկ առավոտյան հայտնի դարձավ, որ «Ժառանգություն» կուսակցության առաջնորդ Րաֆֆի Հովհաննիսյանը կնոջ և որդու հետ մեկնել է Մոսկվա:

Անսպասելի այս լուրն առաջին պահին լուրջ չէր ընդունվում: Ապրիլի 9-ին Ազատության հրապարակում Րաֆֆի Հովհաննիսյանը հայտարարել էր. «Պատրաստ եմ ոչ թե մեռնելու, այլ ապրելու և գնալու վաղը առավոտ Մոսկվա և Պուտինի հետ հանդիպելու և հայ ժողովրդի հաղթանակը բերելու, պատրաստ եմ դա անել ԱՄՆ-ի, Չինաստանի հետ»: Քիչ անց, սակայն, տեղեկությունը պաշտոնապես հաստատեցին «Ժառանգություն» կուսակցության ներկայացուցիչները: Բայց նրանցից որևէ մեկն այդպես էլ հստակ պատասխան չտվեց, թե որն է Հովհաննիսյանի Մոսկվա մեկնելու նպատակը: «Ժառանգության» գլխավոր քարտուղար Ստեփան Սաֆարյանը մի շարք լրատվամիջոցների հայտնեց, որ Հովհաննիսյանի մոսկովյան այցը ոչ թե վերջինիս նախաձեռնությամբ է տեղի ունենում. այլ պաշտոնական հրավերով: Թե կոնկրետ ով է հրավիրող անձը, այդպես էլ հայտնի չդարձավ: «Առավոտի» հարցին՝ Վլադիմիր Պուտինի հետ է հանդիպելո՞ւ, թե՞ Դմիտրի Մեդվեդևի՝ Ստյոպա Սաֆարյանը պատասխանել էր. «Ես հանդիպման ձևաչափի մասին տեղեկություններ չունեմ, ուղղակի գիտեմ, որ պլանավորված հանդիպումներ ունի: Հանրահավաքի հենց սկզբում արդեն ակնհայտ էր, որ ինքը պլանավորել է նման հանդիպում: Մինչև նախագահական ընտրություններն էլ ինքը Ելիսեյան պալատից հրավեր ստացավ ու գնաց, իր նախաձեռնությամբ չի գնացել՝ ոչ Ֆրանսիա, ոչ էլ Ռուսաստան: Ես գիտեմ մի բան՝ այդ հանդիպումը Մոսկվայում պատահականությունների շարքից չէ, իր նախաձեռնությամբ չի, գիտեմ, որ նախապես իր մոտ հանդիպման եկել են: Ենթադրում եմ, որ եղել է նաև այդ հրավերը բերելու, փոխանցելու հետ կապված: Ես կարող եմ վստահ լինել, որ դա փոխանցված հրավեր է եղել»:

Րաֆֆի Հովհաննիսյանի մոսկովյան անսպասելի այցի մասին առայժմ հայտնի չէ: Հստակ է միայն մի բան այցը մեկօրյա է, «Ժառանգության» առաջնորդն այսօր ժամը 16-ին արդեն Հայաստանում կլինի, իսկ ժամը 18-ին կմասնակցի Ազատության հրապարակում նախապես հայտարարված հանրահավաքին:

Հիշեցնենք, Րաֆֆի Հովհաննիսյանն այսօր Ազատության հրապարակում պատրաստվում է հանդես գալ ծրագրային ելույթով: Այս մասին նա հայտարարել էր դեռ ապրիլի 9-ին: Ենթադրվում է, որ նա որոշակի մանրամասներ կներկայացնի իր մոսկովյան այցից ևս, ինչպես նաև կբացատրի, թե ինչպես է պատկերացնում իր հետագա քայլերն ու պայքարը:

թաղո՞ւմ են պայքարը

Մինչ այսօր Ազատության հրապարակում Րաֆֆի Հովհաննիսյանը որոշակի պարզաբանումներ կտա իր հետագա քայլերի և ապրիլի 9-ին տեղի ունեցածի մասին, կոնկրետ ուղղվածություն ունեցող լրատվական կայքեր, քաղաքագետներ, ընդդիմության մի հատվածը և իշխանությունը արդեն երկու օր է, անխնա քննադատում են Հովհաննիսյանին՝ ապրիլի 9-ին կատարած նրա մի շարք քայլերի համար: Ընդ որում, դա անում են ամենավիրավորական արտահայտություններով, ծաղրանկարներով, Րաֆֆու «տապանաքարով» և այլն: Facebook սոցիալական ցանցում մի իսկական պատերազմ է սկսվել Րաֆֆիից հիսաթափվածների, նրա ընդդիմախոսների և դեռ հավատացողների ու «Ժառանգության» անդամների միջև: Կրքերն ու բանավեճերը տեղ-տեղ այնքան են թեժանում, որ որոշ ավելի սառը դատողներ ժամանակ առ ժամանակ զինադադար են առաջարկում: Հասկանալի է, որ այդ «պատերազմը» դեռ մի երեք, չորս շաբաթ էլ կշարունակվի և հնարավոր է, առավել սուր դրսևորումներով: Բայց թերևս միայն այսօր Ազատության հրապարակում Րաֆֆի Հովհաննիսյանի ելույթից և սպասվող հանրահավաքից հետո հստակ կդառնա՝ ավարտվե՞ց նրա ղեկավարած շարժումը, թե ոչ: Ամեն դեպքում, այս օրերին իշխանությունը զգուշանում է կոնկրետ և կտրուկ քայլեր անելուց: «ՀԺ»-ն տեղեկացրել էր, որ իշխանության ներսում չեն բացառում, որ մայիսի 5-ին տեղի ունենալիք Երևանի ավագանու ընտրություններում հնարավոր է, անակնկալներ լինեն, այնպես, ինչպես եղան փետրվարի 18-ի նախագահական ընտրություններում: Դրանով է պայմանավորված նաև այն, որ Սերժ Սարգսյանը դեռ չի շտապում նոր կառավարության կազմ ձևավորել և այդ գործը թողել է մայիսի 5-ի ընտրություններից հետո (բացառությամբ վարչապետի նշանակման, քանի որ ՀՀ Սահմանադրությունը թույլ չի տալիս դա անել ավելի ուշ. վարչապետի նշանակման վերջնաժամկետը ապրիլի 19-ն է):

Իշխանական հավաստի աղբյուրները վստահեցնում են, որ նոր ֆորս-մաժորի դեպքում, Սերժ Սարգսյանը Երևանի ավագանիում ՀՀԿ-ի մեծամասնությունը պահպանելու համար հնարավոր է ստիպված լինի ԲՀԿ-ին կրկին կոալիցիա հրավիրել, թեև այս պահին և՛ ՀՀԿ-ն, և՛ ԲՀԿ-ն պաշտոնապես և ոչ պաշտոնապես հերքում են, որ կոալիցիոն գործընկերությունը նրանց միջև կարող է վերականգնվել: Մինչ այդ ԲՀԿ-ն փորձելու է իր քարոզարշավը տանել ամենաընդդիմադիր շեշտադրումներով, մյուս ուժերը ևս փորձելով հնարավորինս փոշիացնել ընդդիմադիր ընտրազանգվածի ձայները:

Եվ արդեն երկու օր Րաֆֆի Հովհաննիսյանի դեմ իրականացվող հարձակումները պայմանավորված են հենց մայիսի 5-ին սպասվող ավագանու ընտրություններով: Մինչ օրս բոլոր հարցումներով առաջատարն է «Բարև Երևան» դաշինքը, ինչը բնականաբաբ իշխանական և ընդդիմադիր ուժերի սրտով չէ: