Եվս մեկ պաշտոն՝ Արթուր Բաղդասարյանին (տեսանյութ)

«Մարդու իրավունքների պաշտպանությունը ՀՀ ազգային անվտանգության գերակայություններից է, և Հայաստանում ստեղծվել է մարդու իրավունքների պաշտպանության ազգային հանձնաժողով, որը ես գլխավորում եմ։ Այդ կապակցությամբ ստորագրվել է ՀՀ նախագահի  համապատասխան հրամանագիրը։ Մենք անվտանգության խորհրդում հաստատել ենք ազգային անվտանգության կարևորագույն բաղկացուցիչներից մեկի՝ մարդու իրավունքների պաշտպանությանն առնչվող ազգային ռազմավարությունը։ Այսուհետ հետամուտ ենք լինելու այս ոլորտում կուտակված խնդիրների լուծմանը։ Ես կարևորում եմ Հայաստանում ՄԻՊ-ի գործունեությունը և դրական եմ գնահատում»։ Այս մասին այսօր ՄԻՊ գրասենյակում լրագրողների հետ հանդիպմանն ասաց ԱԱԽՔ քարտուղար Արթուր Բաղդասարյանը։

Վերջինիս խոսքով՝ Հայաստանում մարդու իրավունքների պաշտպանության վիճակը էական բարելավումների կարիք ունի։ Օրենքներում գրված փաստաթղթային նորմերից պետք է անցում կատարվի իրական պաշտպանության, մարդու իրավունքների պաշտպանության վիճակի էական բարելավման։ Արթուր Բաղդասարյանը համոզված է, որ այստեղ շատ խնդիրներ կան, և խոստանում է անպայման լուծել դրանք։ ՄԻ պաշտպանության հետ կապված պաշտպանի բոլոր դիտարկումները դառնալու են քննության առարկա Մարդու իրավունքների պաշտպանության ազգային հանձնաժողովում։

ՄԻՊ Կարեն Անդրեասյանը լիահույս է, որ այս հանձնաժողովի աշխատանքը բեղուն կլինի և ՄԻՊ 2012թ. տարեկան զեկույցում առաջ բերված 148 համակարգային խնդիրների լուծմանը, եթե ոչ բոլորովին ու միանգամից, գոնե տարվա ընթացքում էական առաջընթաց կլինի։ «Հանձանժողովի նպատակն է չափիչի դեր տանել, թե որքանով են այդ աշխատանքները կատարվում։

Մենք իսկապես հավատում ենք, որ այս հանձնաժողովի արդյուքներով մեր ժողովրդին 2013-ին կտրվի ավելի շատ հաց և արդարություն»,-ասում է Կարեն Անդրեասյանը։