«Ազգ». Մեր երիտասարդների 74%-ը կողմ է բանակում ծառայելուն

ԵՊՀ ժուռնալիստիկայի ֆակուլտետը երկամյա հետազոտություն է անցկացրելՙ պարզելու հեռուստատեսության, սոցիալական ցանցերի, համակարգչային խաղերի եւ ֆիլմերի ազդեցության խնդիրները դեռահասների վրա: Երեք հոգուց բաղկացած խումբը 2 տարի ուսումնասիրել է հատկապես այն էլեկտրոնային մեդիաարտադրանքը, որն առավել լայն սպառում ունի դեռահասների շրջանում: Հարցումներին մասնակցել է 5000 դեռահասՙ հանրապետության տարբեր մարզերից: Հարցումներն օգնել են մասնագետներին պատկերացում կազմելու հայ դեռահասի մեդիահետաքրքրությունների, մտածելակերպի եւ արժեհամակարգի մասին:

«Մեզ առավել հետաքրքրում էր, թե ինչ է մտածում դեռահասը իր հայրենիքի, բանակի, ընտանիքի, հարազատների, դպրոցների եւ մի շարք այլ կարեւոր իրողությունների մասին», ներկայացնելով հետազոտության արդյունքներըՙ ասաց ժուռնալիստիկայի ֆակուլտետի դեկանի տեղակալ Անահիտ Մենեմշյանը : Հարցվածների գերակշռող մեծամասնությունը դիտում է հեռուսատեսություն, 5 տոկոսը ռադիո է լսում:

Մեր երիտասարդների 74 տոկոսը հեռուստատեսության լավագույն արտադրանքը համարում է սերիալը: Զավեշտալի դեպքեր են արձանագրվել, երբ հեռուստահաղորդման անվան տակ էլ երիտասարդները սերիալի անուն են գրել: Աստղային կյանքին վերաբերյալ հաղորդումներ դիտում է 30 տոկոսը, եւ միայն 10 տոկոսին են հետաքրքրում հասարակական-քաղաքական հաղորդումները:

Երիտասարդների մեծամասնությունըՙ 70 տոկոսը, համացանցը գնահատում է միայն որպես շփվելու համար նախատեսված հարթակ: Առավել քիչ տոկոսն է համացանցն ընկալում որպես տեղեկատվություն ստանալու աղբյուր: Սոց. հարցումը պարզել է, որ մեր երիտասարդների գերակշռող մեծամասնությունը նախընտրում է odnoklassniki.ru կայքը:

Երիտասարդների 53 տոկոսի գնահատմամբ մեր բանակը հզոր է, 46 տոկոսի գնահատմամբՙ բանակն իդեալական չէ, բայց վատն էլ չէ, ուղղակի կան խնդիրներ: Երիտասարդների 4 տոկոսն առավել խիստ է գնահատում բանակն ու համարում, որ ներսում ամեն ինչ գլխիվայր է:

Երիտասարդների 74 տոկոսը հաստատակամ էՙ պետք է ծառայել բանակում, 24 տոկոսը նախընտրում է ծառայել, բայց տանն ու ընտանիքին մոտ զորամասում, իսկ 7 տոկոսը մերժում է բանակում ծառայելու գաղափարը:

Խոսելով արտագաղթի եւ այլ երկրում ապրելու ցանկությունների մասին, երիտասարդների 52 տոկոսը հայտարարել է, որ եթե այլ երկրում կարողանա ավելի լավ ապրել, կհեռանա Հայաստանից, 43 տոկոսը կհաղթահարի դժվարությունները եւ երկիրը երբեք չի լքի, իսկ 6 տոկոսը չի ցանկանում ապրել Հայաստանում: