«Ազգ». Ստեփանակերտի օդանավակայանը և... Իլհամ Ալիևի երրորդ ժամկետը

«Թուրան» գործակալությունը, հղում անելով «ԵԱՀԿ-ին մոտ դիվանագիտական աղբյուրին», տեղեկացրել է, որ «այս տարվա ամռան սկբին հայկական կողմը ծրագրւմ է գործարկել «Խոջալուի» (չակերտները մերն են- Վ. Ա.) օդանավակայանը»: Ըստ այդմ, «հատկապես այդ պատճառով է, որ ԵԱՀԿ Մինսկի խմբի համանախագահները ջանքեր են գործադրում' կողմերին զսպելու քայլերից, որ կարող են սրել իրավիճակը եւ հանգեցնել մարտական գործողությունների վերսկսման» (տես' http://www.contact.az/docs/2013/Politics/041100034361ru.htm):

Նույն «աղբյուրի» ասելովՙ «ԵԱՀԿ-ն եւ առհասարակ Արեւմուտքը հնարավորությոուն չեն տեսնում, որ Երեւանին ստիպեն հրաժարվելու այդ ծրագրից, ինչպես նաեւ չունեն լծակներ, որպեսզի Բաքվին զսպեն օդանավակայանին եւ քաղաքացիական օդանավաներին հարվածելուց»: Ադրբեջանական լրատվամիջոցը, շարունակելով «դիվանագիտական աղբյուրի» միտքը, գրում է, որ ներկա իրավիճակում միջնորդներին եւ Մինսկի խմբի երկրների առաջնորդներին «ոչինչ չի մնում, քան հաշվարկել հակամարտության կողմերի հաջորդող քայլերը, ինչպես նաեւ լայնածավալ պատերազմի վերսկսման դեպքում իրենց սեփական գործողությունները, քանի որ այդ հարցում միջազգային հանրությունը միասնական գիծ կամ հայեցակարգ չունի» (նույն տեղում):

Այնուհետեւ «դիվանագիտական աղբյուրը» կարծիք է հայտնել, թե «Հայաստանը կարող է գիտակցաբար իրավիճակը սադրել, որպեսզի կանխի Ադրբեջանի ռազմական օպերացիան եւ նրան անսպասելի հարված հասցնելու առավելություն չտալ»: Մինչեւ այս պահը «Թուրան»-ի տեղեկատվությունը, որքան էլ ինտրիգային, առաջին հայացքից կարող է թողնել «հավաստիությանը մոտի» տպավորություն: Արդեն «միայն» լրատվամիջոցի կողմից արված ընդհանրացումը, սակայն, արագորեն բացում է վարագույրը:

- Արժե ընդգծել,- գրել է «Թուրան»-ը,- որ հարցն Իլհամ Ալիեւի համար կարող է ունենալ առանցքային նշանակություն... Եթե նա «կուլ տա» եւ թույլատրի «Խոջալուի» (չակերտները մերն են- Վ. Ա.) օդանավակայանի գործարկումը, դա կարող է ուժեղ ազդել նրա վարկանիշին: Այդ պատճառոով էլ իրավիճակը սրելուն ուղղված քայլերը կբարձրացնեն նրա հեղինակությունը:

«Թուրան» գործակալությունը գերազանցապես սպասարկում է «Մուսավաթ» կուսակցության քաղաքական շահերը: Ուստի ենթադրելի է, որ «ԵԱՀԿ-ին մոտ կանգնած դիվանագիտական» ոչ մի աղբյուր էլ Ստեփանակերտի օդանավակայանը «ամառվա սկզբին շահագործելու» մասին ոչինչ էլ չի ասել: Դա ԵԱՀԿ ՄԽ համանախագահների' օրերս տարածաշրջանային այցի արդյունքով Վիեննայում տարածած հայտարարությունից յուրովի քաղած տեղեկատվություն է:

Միջնորդները խոսել են այն մասին, որ «դեպի Լեռնային Ղարաբաղ եւ հակառակ ուղղությամբ թռիչքների կազմակերպման հնարավորությունը» նույնպես քննարկման առարկա է եղել, ինչպես նաեւ ընդգծել, որ կողմերը «հավաստել են խնդրի խաղաղ կարգավորմանն իրենց հավատարմությունը»:

Համադրելով այս երկու գաղափարներըՙ «Թուրան»-ի մեկնաբանները եզրակացության են եկել, որ միջազգային հանրությունը, ի դեմս ԵԱՀԿ ՄԽ համանախագահ երկրների, Ստեփանակերտի օդանավակայանի գործարկմանն սկզբունքորեն դեմ չէ, դա չի համարում «անօրինական» կամ «բանակցությունների հաջողությանը խոչընդոտ», ինչպես պնդում է պաշտոնական Բաքուն:

Քաջ գիտակցելով, որ Իլհամ Ալիեւը որեւէ ռեսուրս չունի' դիմադրելու միջազգային հանրության տեսակետին, ադրբեջանական արմատական ընդդիմությունն, այսպիսով, «Թուրան» գործակալության խողովակն է օգտագործել' հղելու սպառնալիք, որ Ստեփանակերտի օդանավակայանը գործարկելու իրողությունը «կուլ տալու» դեպքում նրան «լավ օրեր չեն սպասում»: Ադրբեջանական ընդդիմության ամենացայտուն դեմքը' «Մուսավաթ»-ի առաջնորդ Իսա Ղամբարը նման հիստերիկ քայլերի հարուստ փորձ ունի դեռեւս խորհրդային ժամանակներից:

Շատ հնարավոր է, որ նա հաշվարկել է խաղալ Իլհամ Ալիեւի «արժանապատվության» վրա' մղելով ոչ օրդինար գործողությունների, որպեսզի սրված իրավիճակում հնարավոր դարձնի իշխանափոխությունը: Չէ՞ որ մեկ անգամ նա, որպես ԱԺՃ առաջնորդներից, կարողացել է Այազ Մութալիբովին սադրել' պատերազմ սանձազերծելու ԼՂՀ դեմ, եւ հասել նրա տապալմանն ու «դեմոկրատական ուժերի» կողմից իշխանության յուրացմանը: Խնդիրն այն է, թե պատրա՞ստ է, արդյոք, Իլհամ Ալիեւը «երկրորդ անգամ ոտք դնելու միեւնույն ջրում», թե՞ նրա համար գերադասելի է «նվաստացումը կուլ տալու գնով» պահել սեփական «գահը»' որոշ ժամանակ անց որդուն «թագադրելու» մեծ հեռանկարով: