Արտագաղթի ստանդարտիզացիա՝ Հայաստանում

Այն, որ Հայաստանում արտագաղթի թիվը գնալով աճում է, դա թերևս գաղտնիք չէ ոչ մեկի համար։ Այդ մասին էին վկայում Քաղաքացիական ավիացիայի գլխավոր վարչության հրապարակած տվյալները հունվար-փետրվար ամիսներին։

Սակայն, ի զարմանս բոլորիս, ՔԱԳՎ հրապարակած հունվար-մարտ ամիսների տվյալների համաձայն՝ օդային ճանապարհով հարյուր հազարավոր արտագաղթողների թիվը նվազել է 204-ով։

Հրապարակված տվյալները միայն օդային ճանապարհով մեկնածների թվի վերաբերյալ են, էլ չենք խոսում այն մասին, որ ամեն օր Հանրապետության տարբեր ավտոկայաններից ցամաքային ճանապարհով մարդկանցով լի ավտոբուսներ և մեքենաներ են դուրս գալիս ՀՀ տարածքից։

Արտագաղթի տեմպերի չդադարող աճի մասին բարձրաձայնում են Հայաստանի ըննդիմադիր ուժերից գրեթե բոլորը։ Արտագաղթը՝ որպես կարևորագույն հարց, իր տեղն ունեցավ նաև ապրիլի 9-ին Սերժ Սարգսյանի՝ երդմնակալության արարարողության ժամանակ արված ելույթում. «Առաջիկա հինգ տարիներին մեր պետության և ժողովրդի առաջնահերթ խնդիրն եմ համարում տնտեսական առաջընթացը: Հայաստանի հիմնախնդիրների մի ողջ փաթեթ այս հարթությունում է: Կառանձնացնեմ երեք հիմնականը՝ արտագաղթ, գործազրկություն, աղքատություն: Դրանց լուծումները նույնպես այս հարթությունում են: Արդյունավետ և վերելքի ճանապարհը բռնած տնտեսություն. ահա հաջողության մեր բանաձևը»:

Մինչ Սերժ Սարգսյանն իրեն կրկին տրված առաջիկա 5 տարվա ընթացքում փորձելու է կանգնեցնել արտագաղթը, ՀՀ քաղաքացիները լքում են Հայաստանը։

ՔԱԳՎ տվյալների համաձայն՝ 2013-ի հունվար-մարտ ամիսներին Հայաստանի Հանրապետությունն օդային ճանապարհով լքել է 172 376 մարդ։ Նախորդ տարի նույն ժամանակահատվածում օդային ճանապարհով Հայաստանը լքել է 172 580 մարդ։

«Զվարթնոց» օդանավակայանից մեկնող ուղևորների թիվը 2013 թվականի առաջին եռամսյակի ընթացքում եղել է 165 275 մարդ, իսկ 2012-ին՝ 164 880։

«Շիրակ» օդանավակայանից մեկնողների թիվն այս տարվա հունվար-մարտ ամիսներին նվազել է 599-ով. 2013-ին եղել է 7101, իսկ 2012-ին՝ 7700։

Նույն ժամանակահատվածում Հայաստան ժամանածների թիվը, նախորդ տարվա նույն ժամանակահատվածի համեմատ, աճել է։ 2012-ին Հայաստան է վերադարձել 143 998 ամրդ, իսկ 2013-ին՝ 145 508 մարդ։