Այսպես այլևս շարունակվել չի կարող. Արմեն Ռուստամյանը՝ ՀԱԿԿ համագումարին (տեսանյութ)

Այսօր «Հայ ազգային կոնգրես» կուսակցության համագումարին ներկա էր նաև ԱԺ ՀՅԴ խմբակցության պատգամավոր Արմեն Ռուստամյանը, ով ՀՅԴ գերագույն մարմնի անունից ողջունեց ներկաներին։

«Այս համագումարը շատ կարևոր մի ժամանակահատվածում է տեղի ունենում՝ Հայաստանում ընթացող ներքաղաքական և արտաքին քաղաքական լրջագույն գործընթացների մեջ, և ես վստահ եմ, որ համագումարն արգասաբեր իր աշխատանքով կարևորագույն որոշումներ կկայացնի ու կուղորդի ձեր կազմակերպությունն ավելի ու ավելի մեր երկրի արտաքին և ներքին մարտահրավերները հաղթահարելու ուղղությամբ: Մենք իսկապես բարձր ենք գնահատում մեր համագործակցությունը «Հայ Ազգային Կոնգրեսի» հետ: Մեկ տարի էլ չկա, որ ԱԺ-ում աշխատում ենք միասին, և ունենք բավականին լավ փորձ, հաջողված փորձ համագործակցության: Այդ համագործակցությունը բխել է և, վստահ եմ, բխելու է մեր երկրի առջև կանգնած խնդիրները համատեղ լուծելու մարտավարությունից, մեր անկեղծ ցանկությունից՝ իսկապես երկրում փոխել իրավիճակը: Անկախ մեր ունեցած տարբերություններից՝ մենք մեկ բանում համոզված ենք, որ այսպես այլևս շարունակվել չի կարող, մենք պետք է մեր երկիրը փոխենք այնպես, որ կասեցվի այս ահագնացող արտագաղթը։ Արյունաքամ է լինում մեր ժողովուրդը, և մենք, հուսով եմ, կկարողանանք միասին վերադարձնել մեր ժողովրդին մեր հայրենիքն ու մեր հայրենիքում սկիզբ դնել մի գործընթացի, որ բոլորիս երազած Հայաստանն ունենանք օր առաջ»,- իր ելույթում նշեց Արմեն Ռուստամյանը:

Մանրամասները՝ տեսանյութում