Շիրակի ոստիկանապետը՝ Արմեն Մարտիրոսյանին ծեծած ոստիկանի մասին

Այսօր Գյումրու Վարդան Աճեմյանի անվան պետական դրամատիկական թատրոնի դահլիճում տեղի բարձրաստիճան պաշտոնյաների մասնակցությամբ, առանց դրսից եկած հյուրերի, նշվեց ոստիկանի օրը:

Aravot.am-ը Շիրակի մարզի ոստիկանապետ Կարեն Բաբակեխյանից հետաքրքրվեց, թե ինչպե՞ս կգնահատի ապրիլի 9-ին «Ժառանգության» փոխնախագահ Արմեն Մարտիրոսյանին ծեծող կարմիր բերետավորի պահվածքը, նման վարքագիծը հարի՞ր է ոստիկանին: «Ես միանշանակ այն համոզմանն եմ, որ համարժեք պատասխան է տվել ոստիկանը, որովհետև միշտ չէ այնպես, ոնց որ մատուցում են: Կներեք հազար անգամ, բայց ճիշտ խոսալ կա էլի. մարդը պետք է իրա հարցերում, ամեն ինչում ճիշտ լինի: Եթե անգամ ոստիկանը սխալ է, շատ հարցերում ու պարագաներում մենք մեր սխալը ընդունում ենք , ասում ենք, որ սխալ ենք եղել, բայց ի վերջո պետք է ճիշտ մատուցվի հանրությանը և ժողովրդին: Սկսեմ նրանից, որ առաջինը իրեն ճիշտ չի պահել նույն Արմեն Մարտիրոսյանը, մեր ոստիկանները ընդամենը պատասխան են տվել: Ուրիշ բան ասեմ, երևի թե ճիշտ էլ չէր լինի, որ պատասխան էլ չտային, ո՞նց եթե ինքը հարվածում է.. ոստիկանը հիվանդանոցում պառկած է ուղեղի ցնցումով», -ասաց ոստիկանապետը:

«Առավոտ»–ի ճշգրտող այն հարցին՝ Արմեն Մարտիրոսյանին հարվածող ոստիկա՞նն է պառկած հիվանդանոցում, պարոն Բաբակեխյանը հաստատեց՝ կրկնելով. «Հա, բա իհարկե, ինքը հիվանդանոցում ուղեղի ցնցումով պառկած է: Ինչի՞ պետք է անպայման ոստիկանին նսեմացնենք, նվաստացնենք, իջեցնենք, ինչ-որ մի մարդու բարձրացնենք, եթե նժարի վրա ենք դնում, ուրեմն պետք է հավասարաչափ գնա առաջ: Ես համարում եմ, որ ոստիկանները ճիշտ են վարվել, իրանք կատարել են իրանց պարտականությունը, էսօրվա վիճակով ոչ մեկն իրավունք չունի ոստիկանի վրա ձեռք բարձրացնելու, ի՞նչ է դա նշանակում: Հասկացանք, տեղեր կան, պահեր կան, որ էդ նույն ոստիկանը…Ես էսօր թույլ չեմ տա իմ ժողովրդի վրա որևէ մեկը ձեռք բարձրացնի, դուք տեսաք էսքան հանրահավաքներ եղան այստեղ, ոչ մեկի հանդեպ ոտնձգություն չկատարվեց կամ որևէ մեկի հանդեպ մի ավելորդություն ցուցաբերե՞ց մարզի ոստիկանությունը: Ո՛չ, թող հավաքվեն, ոչ մի խնդիր չկա, թո՛ղ ժողովուրդը ընտրի: Արդյունքում էս նույն ժողովուրդը խաբված մնած նույն Րաֆֆի Հովհաննիսյանի կողմից, եկեք ճիշտ խոսանք էլի: Չի կարելի մարդկանց օգտագործել, իսկ ես գտնում եմ, որ որոշ մարդիկ, որոնք ստեղծում են «յանըմ ընդդիմություն», իրանք օգտագործում են ժողովրդին: Չի կարելի նման բան անել», -ասաց Շիրակի մարզի ոստիկանապետ Կարեն Բաբակեխյանը: