Կարեն Բաբակեխյանի ճակատագիրը կախված է միմիայն Վլադիմիր Գասպարյանից

Շիրակի մարզպետ Աշոտ Գիզիրյանի հրաժարականից անմիջապես հետո Գյումրիում սկսեցին խոսել այն մասին, որ շուտով մարզը կլքի նաև ոստիկանապետ Կարեն Բաբակեխյանը: Այս խոսակցությունների հիմքում այն փաստն էր, որ Կարեն Բաբակեխյանը Աշոտ Գիզիրյանի կադրերից է, նրա մոտ ընկերը և նախկին մարզպետը որոշակի դերակատարություն է ունեցել նրան մայրաքաղաքից Շիրակի մարզ տեղափոխելու գործում:

Aravot.am-ը պարոն Բաբակեխյանից հետաքրքրվեց՝ ճի՞շտ են արդյոք այս խոսակցությունները, կա՞ մտադրություն դարձյալ մայրաքաղաք տեղափոխվելու: «Նախևառաջ սկսեմ նրանից, եկեք հասկանանք իրար էլի, ի՞նչ կապ ունի մարզպետարանը ոստիկանության հետ, դրանք տարբեր կառույցներ են: Այո, պարոն Գիզիրյանը իմ ընկերն է, ես ընկերությունից չեմ հրաժարվում երբեք: Նա իմ ընկերն է, մենք միասին բավական երկար տարիներ աշխատել ենք, բայց դա չի նշանակում, որ եթե պարոն Գիզիրյանը հրաժարական է տվել, ուրեմն ոստիկանապետն էլ պետք է հրաժարական տա: Տարբեր ոլորտներ, տարբեր աշխատանքներ են, մենք մեր ընկերությունը մինչև օրս շարունակում ենք, ոչ մի խնդիր չունենք, բայց ես ունեմ իմ տեղը: Եվ հետո իմ հրաժարականը էսօրվա վիճակով էդքան հեշտ չէ, որ ես հրաժարական տամ: Ես կադրային սպա եմ, էսօրվա վիճակում միայն ոստիկանության պետը կարող է իմ ճակատագիրը որոշի՝ մնա՞մ ես, աշխատե՞մ, չաշխատե՞մ, գնա՞մ կամ ուրիշ, մեկ այլ տեղ տեղափոխի իմ ոստիկանության պետը, մարզպետը էստեղ բացարձակապես կապ չունի, և ես էլ հրաժարական չեմ պատրաստվում տալ: Ես էս մարզում դեռ շատ անելիքներ ունեմ, ես ասել եմ Շիրակի մարզը պետք է հասցնեմ նրան, որ մեր հանրությունը, մեր ժողովուրդը ոստիկաններին սիրի, հարգի ու ինչու չէ, պետք է, պարտավոր է վստահի, պիտի վստահի, ես պիտի հասցնեմ դրան: Թու–թու- թու, հլը որ, ոնց որ կամաց-կամաց, բայց հաջողվում է ինձ դա, տեսնենք, հույսեր շատ մեծ ունեմ, որ կհաջողվի», -ասաց Շիրակի մարզի ոստիկանապետը:

Կարեն Բաբակեխյանը մեզ հետ զրույցում խոսեց նաև շիրակցիների՝ ոստիկանների հետ շփվելու առանձնահատկությունից, հանցագործությունների բացահայտումից, մարտի 1-ից:

Ոստիկանապետի հետ ամբողջական հարցազրույցը առաջարկում ենք ընթերցել առաջիկա տպագիր «Առավոտ»-ում: