Տեր-Պետրոսյանը ստում է. Արմեն Մարտիրոսյան

Մայիսի 5-ին տեղի է ունենալու Երևանի ավագանու ընտրությունը: «Բարև Երևան» դաշինքի ցուցակը գլխավորում է «Ժառանգություն» կուսակցության ներկայացուցիչ Արմեն Մարտիրոսյանը:

Լուրեր.com-ը զրուցեց Արմեն Մարտիրոսյանի հետ, ով նշեց, որ շուտով կսկսեն հանդիպումները քաղաքացիների հետ:

Անդրադառնալով ՀԱԿ կուսակցության համագումարին Լևոն Տեր-Պետրոսյանի այն հայտարարությանը, որում վերջինս ասել էր, որ հիմա էլ իրենք «Ժառանգության» հետ պատրաստ են համագործակցել. «Խնդրեմ, եկեք՝ միանանք: Մենք նախապես էլ էինք ասում՝ կարելի է միասնական ցուցակով գնալ, մենք հավակնություններ չունեինք քաղաքապետ ունենալու, թող առաջին դեմքը ով կուզի լիներ՝ դաշնակցական լիներ, ժառանգական լիներ, բարգավաճից լիներ, մեզ համար ոչ մի նշանակություն չուներ: Պատրաստ էինք մեր ամբողջ ուժերը ներդնել այդ գործում: Չուզեցին, չարեցին: Դաշնակցությունն առաջարկեց մի ուրիշ ֆորմատ՝ երեքով փորձեցին առանց մեզ, մի ընդհանուր լեզու գտնել, էլի չստացվեց: Այստեղ ո՞վ է մեղավոր, ես չգիտեմ», ի պատասխան՝ Մարտիրոսյանն ասաց.

«Ճիշտ չի ասում: Ավագանու ընտրությունների հետ կապված՝ մենք իրենց առաջարկ ենք արել և սպասել ենք, որ իրենք էլ մեկ այլ առաջարկ անեն այդ առումով, ճիշտ չի ասում: Միայն Երևանի ավագանու ընտրություննե՞րն են ընտրություն, նախագահական ընտրությունները ընտրություններ չէի՞ն: Ինչ-որ բան փոխվե՞լ է ընտրական օրենսգրքի մեջ, կամ հանձնաժողովների աշխատա՞նքն է ավելի թափանցիկ դարձել:

Ոչի՛նչ չի փոխվել: Եթե կար ցանկություն համագործակցելու, նախագահականը կար, թող գային համագործակցեին: Ավագանու ընտրություններին էլ մենք համագործակցության ձեռք մեկնել ենք, բայց իրենք չեն ընդունել այդ ձեռքը, այնպես որ, այդ համագումարի ընթացքում ասած իր խոսքը բացարձակ ճիշտ չէ»:

Անդրադառնալով նաև Տեր-Պետրոսյանի այն հայտարարությանը, որ հետընտրական շրջանի իրադարձություններում «տեսանք ամեն ինչ՝ բացի քաղաքական պրոցեսից», Մարտիրոսյանն արձագանքեց.

«Ինչ վերաբերում է քաղաքական պրոցեսներին, միայն 2008-ի հետընտրական պրոցեսներն էին քաղաքական, 2013-ինը, որ այդքան մարդ մասնակցում է, որ նույնիսկ մարդիկ ոտքով են մարզերից իրենց նախաձեռնությամբ գալիս պայքարելու, դա «քաղաքական չէ»: Միայն իր նախագահական ընտրություններից հետո է քաղաքական պրոցես եղել»:

Տեր-Պետրոսյանը, ՀԱԿ համագումարում անդրադառնալով մեղադրանքներին, թե ինչու ինքը և ՀԱԿ ղեկավարությունը չգնացին հարթակ ու չմիացան Րաֆֆի Հովհաննիսյանին, ասել էր.

«Այստեղ՝ կներեք: Մի շատ մոդայիկ հարց կա, որը շրջանառության մեջ է դրել մեր «հարգարժան» Սերժ Սարգսյանը. միանայի, ի՞նչ անեի:

Միանայի, որ գնայի Վովա Գասպարյանի հետ աղոթեի՞: Կներեք, ուզում եք՝ հավատաք, թե չհավատաք, բայց իմացեք, որ Վովայի հետ աղոթելը իմ մանկության երազանքը չի եղել»:

Այս մասին Մարտիրոսյանն ասաց.

«Թող շուտ գար, աղոթելու խնդիր չառաջանար: Կամ էլ  թող ինքն աղոթեր Րաֆֆի Հովհաննիսյանի հետ, ոչ թե Վլադիմիր Գասպարյանը: Եվ դա մատի փաթաթան դարձնել պետք չի, հատկապես որ Վլադիմիր Գասպարյանն ինքն է եկել միացել Րաֆֆի Հովհաննիսյանին, և այստեղ որևէ խնդիր գոյություն չունի»: