Գագիկ Խաչատրյանի աշխատանքային այցը Պանամա

«Մեկ պատուհանը» միջտարածաշրջանային կապերի ապահովման հիմնական գործիք

Ապրիլի 2-6-ը ՊԵԿ նախագահ Գագիկ Խաչատրյանը և նախագահի առաջին տեղակալ Արթուր Աֆրիկյանը աշխատանքային այցով գտնվում էին Պանամայում:

ՊԵԿ պատվիրակությունը մասնակցել է «Համաշխարհային մաքսային կազմակերպության մաքսային ծառա¬յությունների ղեկավարների գործընկերության երկխոսություն. արդյունավետ և անվտանգ առևտուր» թեմայով համաժողովին, որի ընթացքում քննարկվել են մաքսային ընթացակարգերի ներդաշնակեցման վերաբերյալ ձեռքբերումները, դրանց իրականացման ճանապարհին ի հայտ եկող մարտահրավերները՝ հաշվի առնելով նաև Կիոտոյի վերանայված կոնվենցիայի դրույթները: Հանգամանորեն ներկայացվել են տեղեկատվության էլեկտրոնային փոխանակման զարգացման հեռանկարները ինչպես մասնավոր հատվածում, այնպես էլ պետական կառավարման համակարգում: Այդ համատեքստում կարևորվել է նաև մաքսային գործունեության ոլորտում տեղեկատվության էլեկտրոնային փոխանակման ծավալների և ուղղությունների ընդլայնումը, մասնավորապես նշվել է, որ «մեկ պատուհանը» պետք է հանդիսանա միջտարածաշրջանային կապերի ապահովման հիմնական գործիք: Հանդիպման ժամանակ կարևորվել է «Լիազորված տնտեսվարող օպերատորների» համակարգի ներդրման հարցը: Համաժողովի մասնակից երկրները նշել են նաև անօրինական առևտրի դեմ պայքարի արդյունավետության բարձրացման անհրաժեշտությունը, կարևորվել է Համաշխարհային մաքսային կազմակերպության մաքսային իրավախախտումների և RILO ցանցերի գործունեությունը:

Տեղի են ունեցել նաև ՀՀ ԿԱ ՊԵԿ պատվիրակության երկկողմանի հանդիպումներ Համաշխարհային մաքսային կազմակերպության գլխավոր քարտուղարի, ինչպես նաև Պանամայի մաքսային ծառայության գլխավոր տնօրենի հետ, քննարկվել են հետագա համագործակցության և փոխօգնության ուղղությունները: Համաժողովի ընթացքում սահմանվել են երեք առաջնային ուղղություններ' առևտրի բնագավառում փոխհամագործակցություն, առևտրի անվտանգություն և տեղեկատվության էլեկտրոնային փոխանակում: Ձեռք են բերվել պայմանավորվածություններ համագործակցությունն ակտիվացնելու ուղղությամբ: