Լիլիթ Պիպոյան. «Իմ համերգին միայն ռաբիզները չեն լինում»

Երեկ կայացավ հեղինակ կատարող Լիլիթ Պիպոյանի ակումբային մենահամերգը: Իր լսարանին ներկայանալու համար նա ընտել էր Burbon street ժամանցային ակումբը: Երգչուհին կատարեց իր երգացանկից մոտավորապես 10-15 երգ. «Համերգս կարելի է ասել, նոր ձայնասկավառակիս շնորհանդեսն է» ArmStar.am-ի հետ զրույցում նշել է Լիլիթը:

Ակումբում հավաքված էին Լիլիթ Պիպոյանի արվեստի սիրահարները՝ առանց տարիքային տարբերության. «Իմ լսարանը տարբեր է, անգամ տարիքային առումով է տարբեր, միայն ռաբիզներ չեն լինում իմ համերգներին»:

Երգչուհու համերգները միշտ ուղեկցվում են իմպրովիզներով, նախատեսված երգացանկն ավարտվելուց հետո հանդիսատեսը նրան բաց չի թողնում. «Եթե զգում եմ, որ ուզում են, էլի եմ երգում, բայց այնքան չէ, որ զզվացնեմ, մի քիչ համը պետք է բերաններում մնա»,-անկեղծացավ Լիլիթը:

Նա չի հետաքրքրվում թե ինչ է կատարվում հայկական շոու բիզնեսում. «Չեմ հետևում ու չի հետաքրքրում, ականջովս չի ընկել ոչ մի որակով բան, համենայնդեպս, եթե եղած լիներ, անմիջապես կնկատեի»: Իսկ խոսելով այն մասին, որ այսօր երաժիշտները զբաղեցնում են պատգամավորի պաշտոն, ասաց հետևյալը.«Ես որոշ չափով հետաքրքրվում եմ մեր կյանքով, բայց ոչ այնքան, որ դառնամ քաղաքական գործիչ, ես դրա մասնագետը չեմ»:

Այն հարցին, թե ինչո՞ւ հաճախ համերգով հանդես չի գալիս՝ երգչուհին դիմեց ընթերցողներին. «Դուք հետազոտեք պատճառը, համենայնդեպս իմ չցանկանալը չի»: