Երևանյան միջազգային տանգո փառատոնը՝ մշակութային գունապնակում

Երևանյան միջազգային տանգո փառատոնի նախասկիզբը 2004 թ. ապրիլի 11-ի «Կադանս» անսամբլի համերգն էր, որի ծրագիրը կազմված էր արգենտինյան տանգոներից և Աստոր Պյացոլլայի հիասքանչ ստեղծագործություններից: Տանգոյի բազմերանգ և զգացմունքային գլուխգործոցները հայ հանդիսատեսին առաջին անգամ էր մեկ համերգով ներկայացվում:

ՀՀ մշակույթի նախարարության և «Մեցցո» պրոդյուսերական կենտրոնի աջակցությամբ, «Կադանս» երաժշտական կենտրոնը 2010 թ. հիմնադրել է Երևանյան միջազգային տանգո փառատոնը: Փառատոնի անդրանիկ համերգը կայացել է 2010 թ. հոկտեմբերի 30-ին, Ալ. Սպենդիարյանի անվան օպերայի և բալետի ազգային ակադեմիական թատրոնում, այնուհետև, «Մեցցո» ակումբում՝ ֆրանսիացի հանրահայտ ակորդեոնահար Ռիչարդ Գալլիանոյի և «Կադանս» անսամբլի փայլուն ելույթներով: 2011 թ. ապրիլին տեղի է ունեցել արգենտինացի աշխարհահռչակ բանդոնեոնահար Մարսելո Նիսինմանի և դիրիժոր Ֆակունդո Ագուտինի երկու համերգը՝ «Կադանս» անսամբլի և Ալ. Սպենդիարյանի անվան օպերայի և բալետի ազգային ակադեմիական թատրոնի սիմֆոնիկ նվագախմբի հետ: Նույն տարվա մայիսին, Երևանում փառատոնի շրջանակներում, կայացել է Ռուսաստանի հեղինակավոր խմբերից մեկի՝ «Տերեմ» քառյակի երկու անմոռանալի ելույթ ևս:
2013 թվականի տանգո փառատոնի ծրագրում ներառված է 8 համերգ. 4-ը՝ «Կադանս» անսամբլի նախափառատոնյան ելույթները, նախատեսված են երիտասարդության համար՝ մարտի 26-ից ապրիլի 5-ը Երևանի պետական համալսարանում, Չայկովսկու անվան երաժշտական դպրոցում, Խաչատուր Աբովյանի անվան մանկավարժական և Բրյուսովի անվան պետական լեզվաբանական համալսարաններում: Փառատոնի օտարերկրացի հյուրերի՝ արգենտինացի հայտնի բանդոնեոնահար Վալտեր Ռիոսի և երգչուհի Մարիել Դյուպետիի ելույթները «Կադանս» անսամբլի հետ տեղի կունենան ապրիլին՝ Գյումրիում և Երևանում: Այս համատեքստում, ապրիլի 17-ին Վալտեր Ռիոսը և երգչուհի Մարիել Դյուպետին «Կադանս» անսամբլի հետ ելույթ կունենան երաժիշտ-կատարողների «Վերածնունդ» միջազգային 5-րդ փառատոն-մրցույթի շրջանակում՝ Գյումրիում, իսկ ապրիլի 20-ին, Երևանում՝ Արամ Խաչատրյան համերգասրահում: Փառատոնի 7–րդ համերգը նախատեսված է մայիսին՝ Վանաձորում, իսկ եզրափակիչ 8-րդ համերգը՝ հունիս-հուլիս ամիսներին: Եզրափակիչ համերգը հատկանշանական է այն առումով, որ նախատեսվում է Աստոր Պյացոլլայի «Տարվա եղանակներ» հանրահայտ ստեղծագործության համաշխարհային շնորհանդեսը: Պյացոլլայի այս գլուխգործոցը հայ կոմպոզիտոր Կարեն Անանյանի կողմից հատուկ վերամշակվել է հնգյակի, մարիմբայի և սիմֆոնիկ նվագախմբի համար, որպեսզի «Կադանս» անսամբլը և Հայաստանի պետական երիտասարդական նվագախումբn այն ներկայացնեն 2013 թ. Երևանյան միջազգային տանգո փառատոնի շրջանակներում: