Ծառուկյանը կզրկվի՞ սպորտի ոլորտի մենաշնորհից

Սպորտի և երիտասարդության հարցերի նախարար Հրաչյա Ռոստոմյանը նոր կառավարությունում այլևս չի պաշտոնավարի: Դեռ հայտնի չէ՝ ով է դառնալու հաջորդ նախարարացուն, բայց այս պահի դրությամբ՝ Ռոստոմյանի պաշտոնանկության հարցը, կարծես թե, որոշված է:

Հրաչյա Ռոստոմյանը դարձավ ՀՀ նախարար, քանի որ այդպես ցանկացավ սպորտի ոլորտը վերահսկողը. Ռոստոմյանն Օլիմպիական կոմիտեի նախագահ Գագիկ Ծառուկյանի հավատարիմ «Հրաչիկն» էր: Այս նախարարը նշանակվել էր ճիշտ նույն կերպ, ինչ կերպ նշանակում էին ստացել նրա նախորդները: Քանի որ դեռ հաջորդ պաշտոնակատարի հարցը վերջնականապես որոշված չէ, դժվար է ասել՝ արդյո՞ք վերջինիս պաշտոնանկությունը ևս կլինի նույն տրամաբանության մեջ՝ հաշվի առնելով, որ նախորդ նախարարների պաշտոնավարման ժամկետն ավարտվում էր հենց այն րոպեին, որ րոպեին որ նրանց հովանավորյալը գտնում էր, որ այլևս հիշյալ անձնավորության պաշտոնավարումը նպատակահարմար չէ:

Այդպես, նախարար Արմեն Գրիգորյանը պաշտոնանկ արվեց՝ զուտ անձնական նկատառումներից ելնելով, քանի որ ընկավ Ծառուկյանի աչքից, նախարար Արթուր Պետրոսյանը՝ հաշվի առնելով ԲՀԿ-ի՝ կոալիցիայից դուրս գալու հանգամանքը, որից հետո ուժերը դրսևորելու հնարավորություն տրվեց երիտասարդ Ռոստոմյանին: Ներկա նախարարը, ճիշտ է, անկուսակցական է և հենց դրանով էր արդարացվում նրա գոյությունը «բհկազերծ» կոալիցիայում, սակայն ոչ մեկի համար էլ գաղտնիք չէ, որ նա պաշտոնի է, քանի որ այդպիսի պայմանավորվածություն գոյություն ունի, քանի որ իշխանությունների բարեհաճությամբ սպորտի ոլորտի մենաշնորհը դեռևս թողնվում է Օլիմպիական կոմիտեի նախագահի ձեռքում:

Հենց այս իրողությունից ելնելով էլ՝ երևի թե ոչ այդքան հետաքրքիր է Հրաչյա Ռոստոմյան-նախարարի պաշտոնանկությունը, որքան՝ ով կնշանակվի Սպորտի և երիտասարդության հարցերի նախարար:

Եթե որոշվել է սպորտը դուրս բերել Ծառուկյանի վերահսկողությունից, ըստ այդմ՝ ընտրությունը կկանգնի այնպիսի մեկի վրա, ով չի գտնվում ԲՀԿ առաջնորդի իշխանության տակ և ով կկարողանա բավականաչափ ինքնուրույնություն դրսևորել և աշխատել այնպես, որ «ասողը» լինի ոչ թե Օլիմպիական կոմիտեի ղեկավարը, այլ նախարարը: Իսկ եթե, այնուամենայնիվ, իշխանությունների բարի կամքը շարունակվի և սպորտի ոլորտի մենաշնորհը դարձյալ թողնվի Ծառուկյանին, նշանակում է՝ սպորտի և երիտասարդության հարցերի նախարարներ նշանակողն էլի նույն անձնավորությունն է լինելու, նշանակումներն էլի նույն տրամաբանությամբ են կազմակերպվելու, ըստ այդմ՝ «Հրաչյա Ռոստոմյանի պաշտոնանկության»՝ այս պահի դրությամբ ավելի քան հիմնավոր համարվող թեզը սկսում է կասկածի տակ դրվել, քանի որ եթե նշանակողը Ծառուկյանն է և քանի որ նա նշանակում է իր համար տվյալ պահին հաճո թվացող կադրերի, ըստ այդմ՝ ավելի քան զարմանալի կարող է թվալ, թե ինչու պետք է իր բոլոր եղած և չեղած հնարավորություններով Գագիկ Ծառուկյանին հաճոյացող Հրաչյա Ռոստոմյանը պաշտոնանկ լինի:

Լուսինե Կեսոյան