«ՀԺ». Շուտով պաշտոնանկ կարվեն նաև ոստիկանության այլ բարձրաստիճան պաշտոնյաներ

Երևանի ոստիկանապետ Ներսիկ Նազարյանի պաշտոնանկությունից հետո ԶԼՄ-ներում բազմաթիվ հրապարակումներ եղան այն մասին, որ շուտով պաշտոնանկ կարվեն նաև ոստիկանության այլ բարձրաստիճան պաշտոնյաներ։

Խոսք էր գնում, մասնավորապես, ՀՀ փոխոստիկանապետ Սաշիկ Աֆյանի, Հունան Պողոսյանի, Ոստիկանական ակադեմիայի տնօրեն Հովհաննես Վարյանի և այլոց մասին։ Համենայն դեպս, երեկ՝ ուշ երեկոյի դրությամբ, այդ կանխատեսումները չիրականացան՝ վերը նշված անձինք դեռ իրենց պաշտոններին էին։ Գուցե դա պայմանավորված է նրանով, որ երեկ ՀՀ ոստիկանությունը նշում էր իր օրը։ Թերևս։ Այդուհանդերձ, ՀՀ ոստիկանապետ Վովա Գասպարյանը որևէ հստակ բացատրություն չի տալիս, թե ինչու պաշտոնանկ արեց Ներսիկ Նազարյանին ու նրան փոխարինեց ոչ պակաս ադիոզ Աշոտ Կարապետյանով, որը նույնիսկ Եվրադատարանի պաշտոնական փաստաթղթերի համաձայն՝ սարսափելի բռնությունների է ենթարկել մարդկանց։

Ինչպես արդեն նշել ենք, հիմնավոր կասկածներ կան, որ Ներսիկ Նազարյանը պաշտոնանկ է արվել ՀՀ բարձրաստիճան մի քանի ոստիկանների կողմից ստեղծված և նրանց կողմից ղեկավարվող ֆինանսական ապօրինի բուրգի բացահայտման շրջանակում։ Այդ կառույցը խաբեությամբ 2,5 մլն դոլար է կորզել մարդկանցից և «պայթել»։ Ուշագրավ է, որ ըստ մեր տեղեկությունների` այդ «ֆինանսական կառույցի» գլխավոր դերակատարներից է նաև ՀՀ ոստիկանության մարզային վարչություններից մեկի ղեկավարը, որի անունն առայժմ չի նշվում։ Վերջինս՝ ինչ-ինչ մեքենայություններով մի քանի հարյուր հազար դոլարի պարտատեր է դարձել։ Իր այդ պարտքը չստանալու պատճառով մոտ 20 օր առաջ դիմակավորված ու մինչև ատամները զինված ոստիկանների ուղեկցությամբ ներխուժել է պարտապանի սեփականությունը հանդիսացող բնակարան և նրան ստիպել այդ բնակարանը դարձնել իր կամ իր հարազատներից մեկի անունով։

Հոլիվուդյան ֆիլմերի սցենարներին հարիր ոստիկանական այդ օպերացիան, ի դեպ, իրականացվել է ոչ պաշտոնապես։ Այսինքն՝ ոստիկանության աշխատակիցներն այդ օպերացիայի ժամանակ գործել են որպես ամենասովորական հանցագործներ և մարդուն պարզապես ուժով և ապօրինաբար ունեզրկել են։ Մի խոսքով՝ եթե այս «ֆինանսական կառույցի» գործը սկսեն բացահայտել, պետք է լինեն ոչ թե պաշտոնանկություններ, այլ ձերբակալություններ, ընդ որում՝ զանգվածային։ Սակայն, ինչպես տեսնում ենք, գործը կարծես թե փորձում են լղոզել։ Եվ այս ֆոնին երեկ ոստիկանությանն ուղղված շնորհավորանքներ էին հնչում։ Սերժ Սարգսյանի շնորհավորական ուղերձի մեջ էլ կան այսպիսի տողեր. «Ակնհայտ է, որ վերջին տարիներին ոստիկանության ոլորտում իրականացված և իրականացվող բարեփոխումները տվել են իրենց դրական պտուղները: Քաղաքացիների իրավունքների, ունեցվածքի, հատկապես հասարակական կարգի պաշտպանությունն այսօր մեզանում բարձրացված է ավելի հուսալի աստիճանի»: Եթե ոստիկանությունը Սերժ Սարգսյանի ունեցած պատկերացումների շրջանակներում ավելի «բարեփոխվի», ապա մարդկանց ունեցվածքը ոստիկանները կսկսեն խլել ոչ թե դիմակավորված ու զինված, այլ զրահամեքենաներով։