Սաակաշվիլին պատրաստ է պատասխանել 2008-ի պատերազմին վերաբերող հարցերին

Վրաստանի նախագահ Միխայիլ Սաակաշվիլին, ով հրաժարվել էր պատասխանել 2008թ. օգոստոսի ռուս-վրացական պատերազմին վերաբերող Վրաստանի դատախազության հարցերին, հայտարարել է խորհրդարանում այդ հարցերին անդրադառնալու իր պատրաստակամության մասին: Ինչպես իր դրքորոշումը պարզաբանել է վրաց նախագահը «Ռուսթավի» հեռուստաընկերության եթերում տված հարցազրույցի ժամանակ, դատախազությունն այդ դեպքի կապակցությամբ հետաքննելու բան չունի:

Սաակաշվիլին նշել է, որ Ռուսաստանի ղեկավարությունը երբեք էլ չի թաքցրել, որ այդ պատերազմին ինքը պատրաստվում էր շատ ավելի վաղ, քան օգոստոսյան դեպքերն էին: Նախագահի խոսքերով՝ դա ապացուցում են Վրաստանի հասցեին ՌԴ հնչեցրած սպառնալիքները և Աբխազիայում ու Հարավային Օսիայում մեծ քանակությամբ ռազմական տեխնիկա կուտակելու Ռուսաստանի ջանքերը:

«Պատերազմից հնարավոր կլիներ խուսափել, եթե մենք հրաժարվեինք Վրաստանի պետականությունից: Պատերազմի հիմնական պատճառն այն էր, որ մենք խափանեցինք անվտանգության կառույցների նկատմամբ Ռուսաստանի՝ վերահսկողության հաստատման փարձերը: Չնայած ռուսական կողմի դրած էմբարգոյին՝ Վրաստանի տնտեսությունը շատ արագ էր զարգանում, և մենք ապացուցեցինք, որ դա հնարավոր է և առանց Ռուսաստանի հետ տնտեսական համագործակցության»,-հայտարարել է Սաակաշվիլին: