Հրապարակել ընտրողների ցուցակները. կառավարության եզրակացությունը կրկին բացասական է

Գործադիրն այսօր իր բացասական եզրակացությունը տվեց Ազգային ժողովի պատգամավորներ Ռուբիկ Հակոբյանի, Զարուհի Փոստանջյանի և Թևան Պողոսյանի՝ օրենսդրական նախաձեռնության կարգով ներկայացրած «Հայաստանի Հանրապետության ընտրական օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքի նախագծին:

ՀՀ արդարադատության նախարարի պաշտոնակատար Հրայր Թովմասյանը նշեց, որ նախագիծը վերաբերում է մի քանի անգամ քննարկված՝ ընտրողների ցուցակները հրապարակելու ընթացակարգին: 

«Միջազգային չափորոշիչները գալիս են հաստատելու, որ քվեարկության գաղտնիությունն իր մեջ ներառում է նաև քվեարկության մասնակցության գաղտնիությունը, և սրանով պայմանվորված՝ այս փոփոխությունները կամ այս արգելքը նախատեսված են: Միաժամանակ, պետք է արձանագրենք, որ այս փաստաթղթերը չհրապարակելու հանգամանքը քաղաքական որոշ ուժերի մոտ առաջացնում է անվստահության մթնոլորտ: Չնայած այն հանգամանքին, որ անցած տարիներին և վերջին երկու համապետական ընտրություններին ձեռնարկվել են բոլոր միջոցները, մասնավորապես՝ թե՛ օրենսդրությամբ նախատեված ընթացակարգեր, թե՛ ոչ օրենսդրությամբ նախատեսված քայլեր, այնուամենայնիվ, այս խնդիրը շարունակում է մնալ: Այս հարցը նաև քննարկվել է ՀՀ նախագահի կարգադրությամբ»,-ասաց Հրայր Թովմասյանը:

Վերջինս, սակայն, վստահություն հայտնեց, որ որշակի լուծումներ կգտնվեն, բայց այս նախագծին կառավարության եզրակացությունը բացասական է, որովհետև դրանով կխախտվեն միջազգային պարտավորությունները: