Երկու ՀԱԿ՝ մեկ նպատակ

«Հայ Ազգային Կոնգրեսի» քաղաքական խորհուրդը հայտարարություն էր տարածել, որ վերսկսում է իր աշխատանքները` իրական ժողովրդավարության, կուսակցությունների իրավահավասարության և փոխադարձ հարգանքի սկզբունքների հիման վրա, և «Հայ Ազգային Կոնգրեսը» դիմում է իր կազմից դուրս եկած կուսակցություններին՝ վերադառնալ ՀԱԿ՝ նախկինում հռչակված նպատակներին համատեղ ուժերով հասնելու համար:

Ավելի ուշ «Հայ Ազգային Կոնգրես» կուսակցության մամուլի ծառայությունը տարածում է մեկ այլ հաղորդագրություն,  որում ասվում է, որ լրատվամիջոցներին ուղարկվել է «Հայ Ազգային Կոնգրեսի» քաղաքական խորհրդի անունից հայտարարություն, որը «Հայ Ազգային Կոնգրեսի» հետ որեւէ կապ չունի, իսկ ՀԱԿ-ի անունից որևէ այլ հայտարարություն՝ ինքնակոչ գործիչների և կազմակերպությունների կողմից տարածվող, ապատեղեկատվություն է:

 Լուրեր.com-ը այս մասին զրուցեց «Ժողովրդավարական հայրենիք» կուսակցության ղեկավար Պետրոս Մակեյանի հետ:

«Ինքնակոչը նրանք են, ովքեր առանց հարցնելու՝ 18 քաղաքական միավորների ստեղծած կառույցի անունն իրենցով են արել. խոսքը վերաբերում է ՀՀՇ-ին: Մենք ինքնակոչ չենք, մենք 2008-ի օգոստոսի 1-ի ծրագրած հռչակագրի մաս կազմող քաղաքական ուժերն ենք:

ՀՀՇ-ն համագումար արեց, հռչակվեց ՀԱԿ, մնացած ուժերը, ովքեր այդ հռչակագրի տակ ստորագրել էին, բնականաբար, մտածում են հետագա անելիքների մասին: Մենք առաջին նիստը արել ենք, որոշել ենք վերսկսել ՀԱԿ քաղխորհրդի նիստերը՝ օրակարգում ունենալով ժամանակին ՀԱԿ-ից դուրս եկած ուժերի հետ բանակցելը:

Նրանք դուրս են եկել հիմնականում այն պատճառով, որ ՀԱԿ-ը 2011-ից հետո անհեռանկարային քաղաքականություն է սկսել վարել, իսկ հետո՝ երկխոսությունը, հետո՝ ԲՀԿ-ի քաղաքագիտական վերլուծությունը:

Մենք բանակցում ենք, որ իրենք հետ վերադառնան և մենք սկսենք իրագործել հրապարակված մեր մոտեցումները»:

Վերջինս ասաց, որ հաղորդագրությունը, որով կոչ է արվում ՀԱԿ-ից դուրս եկած կուսակցություններին վերադառնալ և նախկինում հռչակված նպատակներին համատեղ ուժերով հասնել, տարածվել է «Հայ Ազգային Կոնգրես» դաշինքի քաղաքական խորհրդի անունից: ԺՀԿ-ը ևս մասնակցել է այդ քննարկումներին:

Հարցին՝ Նիկոլ Փաշինյանի, Հրանտ Բագրատյանի, «Հանրապետություն» կուսակցության հետ բանակցություններ սկսե՞լ են, թե՞ ոչ, Մակեյանն ասաց.

«Աշխատանքային խումբն է վարում բանակցությունները, մենք պարզապես մասնակցել ենք: Առաջին նիստին ներկա է եղել 6 կուսակցություն, երկրորդ նիստին, կարծում եմ, ավելի շատ կլինեն:

Իսկ ինչ վերաբերում է Նիկոլ Փաշինյանին և Հրանտ Բագրատյանին, ասեմ, որ ԱԺ ՀԱԿ խմբակցության տերը ՀԱԿ դաշինքի 10 կուսակցություններն են, որոնցից երկուսը դուրս եկան՝ 8-ն են մնացել:

Բնականաբար, ՀԱԿ դաշինքը ՀՀՇ-ն լուծարել է, հարց է առաջանում, թե ԱԺ խմբակցությունն ում իրավահաջորդն է: Իրավատերը մնում է ՀԱԿ դաշինքը: Մենք փորձում ենք իրավատերութան հարցը լուծել: Մենք բարոյական նորմները պահել ենք, սպասել ենք, որ ՀԱԿ կուսակցությունն իր համագումարն անի, հետո մենք նիստ ենք արել: Մենք չենք փորձել խոչընդոտել, որպեսզի վայրահաչությունը չսկսի մեր վրա, չնայած արդեն սկսվել է»,-ասաց Մակեյանը: