«Նոր ալիք»–ի հայ մասնակիցները՝ Մոսկվայում

«Նոր ալիք 2013» մրցույթի կիսաեզրափակիչ փուլի մասնակիցներն այս շրջանում պատրաստվում են մրցույթի հայ ներկայացուցչի ընտրությանը: «Մանկական նոր ալիք 2013»-ի մասնակիցներն ապրիլի 18-ին արդեն մեկնել են, իսկ մեծերի «Նոր ալիքի» մասնակիցները կմեկնեն ապրիլի 20-ին:

Նշենք, որ մասնակիցների ընտրությունն օնլայն է եղել. նրանք օնլայն հայտագրվել են, ուղարկել իրենց երգերն, ինչից հետո Ռուսաստանում ընտրվել են կիսաեզրափակիչ անցած մասնակիցներին:

Այսպիսով՝ կիսաեզրափակչում են հայտնվել Իվետա Մուկուչյանը, ով մրցույթին կմեկնի Գերմանիայից, Նիկ Էգիբյանը, «Հայաստանի ձայնը» նախագծից հայտնի դարձած Նարեկ Մակարյանը՝ Սոֆիի թիմից, Աիդա Քալանթարյանն ու Մարտ Բաբայանը՝ Սոնայի թիմից, և Հայաստանի ձայնը ճանաչված Մերի Մնջոյանը, ով կիսաեզրափակիչ անցավ առանց նախնական մրցույթին մասնակցելու, քանի որ, ինչպես նախապես հայտարարվել էր, հաղթողին տրվելու էր այդ հնարավորությունը:

Նշենք, որ Մերին երկրորդ անգամ է մասնակցելու մրցույթի կիսաեզրափակչին: Նախորդ տարի նա Սուրեն Առուստամյանի, Լիլիթ Հովհաննիսյանի, Լուսինե Աղաբեկյանի և Հռիփսիմե Հակոբյանի հետ հասել էր կիսաեզրափակիչ, սակայն Հայաստանը ներկայացնելու պայքարում հաղթեց Սուրեն Առուստամյանը:

Այս օրերին Մոսկվա մեկնելուն պատրաստվող Մերին esyes.am-ին հայտնեց, որ մեծ ուրախությամբ ու ոգևորությամբ է մեկնելու մրցույթին: «Այս տարի գնում եմ շատ լավ տրամադրությամբ և հաղթանակի ակնկալիքով: Ոգևորված և ուրախ եմ գնում, որպեսզի ամեն ինչ այդպես էլ ավարտվի: Արդեն հասկանում եմ՝ ինչ կարելի է անել, ինչ՝ ոչ: Հուսով եմ՝ Աստված ինձ հետ կլինի նաև այս մրցույթում և ոչ մի սխալ չեմ անի: Աստված մեզ հետ, տեսնենք՝ ինչպես կստացվի: Եթե ինչ-որ բան այնպես չլինի, հուսախաբ չեմ լինի և չեմ տխրի, որովհետև առջևում ամեն ինչ շտկելու շատ ժամանակ ունեմ,- ասաց Մաշան և հավելեց, որ նախորդ տարի մի քիչ տխրել էր: - Տխրել էի, սակայն գիտակցում էի, որ ես տարիքով փոքր եմ և գուցե պետք չէր, որ ես ներկայացնեի Հայաստանը, որովհետև նախորդ տարի ես 17 տարեկան էի և մրցույթի բոլոր մասնակիցներից ամենափոքրը ես էի: Գիտակցելով, որ էլի կարող եմ մասնակցել, տխրությունս շատ քիչ էր»: