Ուսանողներն ուսումնասիրել են անվտանգության խնդիրները

2012-2013 թթ. «Էկո Փիս» գիտական, էկոլոգիական կազմակերպությունը Հայաստանում իրականացնում էր «Աջակցություն արտադրական անվտանգության վերաբերյալ գիտելիքների հարստացմանը բարձրագույն ուսումնական հաստատություններում» ծրագիրը: Այն ֆինանսավորում էր Գերմանիայի բնության, շրջակա միջավայրի պահպանության և միջուկային ռեակտորների անվտանգության ֆեդերատիվ նախարարությունը։ Ծրագիրը համաձայնեցված ՄԱԿ-ի արդյունաբերական վթարների կոնվենցիայի կառավարման հանձնաժողովի հետ:

Ծրագրին Հայաստանում աջակցել էին նաև ՀՀ արտակարգ իրավիճակների, բնապահպանության նախարարությունները, ինչպես նաև Հայաստանի պետական ճարտարագիտական, Երևանի ճարտարապետության և շինանարության պետական համալասարանները, որոնք ընտրվել էին որպես ծրագրի մոդելային ուսումնական հաստատություններ:

Մարտի 26-ին տեղի ունեցավ ծրագրի ամփոփիչ հանդիպումը, որին մասնակցում էին ՀՀ արտակարգ իրավիճակների, բնապահպանության, առողջապահության, կրթության և գիտության նախարությունների, տարբեր ԲՈՒՀ-երի, միջազգային և հասարակական կազմակերպությունների, արտադրական ձեռնարկությունների, ինչպես նաև Գերմանիայի շրջակա միջավայրի դաշնային գործակալության ներկայացուցիչներ:

Քննարկման առաջին մասը նվիրված էր իրականացված աշխատանքների արդյունքներին: Ելույթներով հանդես եկան ծրագրին մասնակից ԲՈՒՀ-երի ուսանողները՝ ներկայացնելով իրենց կատարած աշխատանքները: Մասնակիցները բարձր գնահատեցին ուսանողների կողմից Հայաստանի արդյունաբերական 5 ձեռնարկություններում իրականացված ուսումնասիրությունները և բարելավման միջոցառումների առաջարկները: Ի դեպ՝ ուսանողներն այդ ուսումնասիրությոuններն իրականացրել են նոր մեթոդաբանությամբ, որը ներկայումս կիրառվում է եվրոպական մի շարք երկրներում և այս ծրագրի շրջանակներում թարգմանվել էր հայերեն:

Հանդիպմանը ներկա ԱՌՆԱՊ հիմնադրամի մասնակիցները (ՀՀ ԱԻՆ, ՃԿՊԱ, UNDP, UNICEF, Armenian Caritas) հանդես եկան հետագա աշխատանքներում համագործակցելու առաջարկներով:

ՄԱԿ-ի անդամ 8 երկրների (Չեխիա, Ռումինիա, Գերմանիա, Ռուսաստան, Մոլդովա, Բելառուս, Ուզբեկստան, Տաջիկստան) պատվիրակները ներկայացրեցին իրենց երկրներում արտադրական անվտանգության ոլորտում իրականացվող գործընթացները:

Ներկաները կարևորեցին Հայաստանում ծրագրի իրականացման գաղափարը, նշելով, որ այն նաև կայուն նախադրյալներ է ստեղծում ծրագրի ավարտից հետո գործընթացի շարունակականություն ապահովելու համար: