Մշակույթի կառավարում. մշակույթի հասանելիության խթանում

Հայաստանի Հանրապետության պատվիրակությունը ՀՀ մշակույթի նախարարի պաշտոնակատար Հասմիկ Պողոսյանի ղեկավարությամբ 2013 թ. ապրիլի 15-ին և 16-ին գտնվում էր Մոսկվայում՝ մասնակցելու Եվրոպայի խորհրդի երկրների մշակույթի նախարարների 10-րդ հոբելյանական համաժողովին: Համաժողովն անցկացվում էր Եվրոպայի Խորհրդի նախաձեռնությամբ, ՌԴ մշակույթի նախարարության աջակցությամբ և կրում էր «Մշակույթի կառավարում. մշակույթի հասանելիության խթանում» խորագիրը:

Համաժողովին մասնակցում էին Եվրոպայի խորհրդի անդամ երկրների մշակույթի նախարարները և այլ պաշտոնյաներ, ինչպես նաև Բելառուսի, Ղազախստանի մշակույթի նախարարները, Մեքսիկայի, ԱՄՆ-ի, միջազգային կազմակերպույթյունների (Եվրամիություն, ՅՈՒՆԵՍԿՕ, CAE, ENCATC, OECD) պաշտոնյաներ, ոլորտի մասնագետներ և պատասխանատուներ:

Համաժողովի նախագահ է ընտրվել ՌԴ մշակույթի նախարար Վլադիմիր Մեդինսկին, իսկ Էստոնիայի պատվիրակության ղեկավար, մշակույթի նախարարության գլխավոր քարտուղարի տեղակալ Ռագնար Սիլի առաջարկով և մասնակիցների ընտրությամբ համաժողովի փոխնագախագահ է նշանակվել ՀՀ մշակույթի նախարարի պաշտոնակատար Հասմիկ Պողոսյանը:

Համաժողովը բաղկացած էր 6 մասից՝ բացման, փակման, պլենար և 3 թեմատիկ նիստերից՝ «Կառավարությունների դերակատարումը. նոր մարտահրավերներ և հնարավորություններ», «Լավագույն փորձ և նորարարական ծրագրեր», «Հեռանկարներ ԵԽ-ի համար»:
Պլենար քննարկումը սկսվել է Հ. Պողոսյանի ելույթով: Նախանշելով ՀՀ Սահմանադրության դրույթները առ այն, որ «յուրաքանչյուր ոք ունի գրական, գեղարվեստական, գիտական և տեխնիկական ստեղծագործության ազատություն, գիտության նվաճումներից օգտվելու և հասարակության մշակութային կյանքին մասնակցելու իրավունք», նախարարը ներկայացրել է մշակույթի բնագավառում սույն դրույթի կատարումն ապահովող ՀՀ պետական մշակութային քաղաքականության ուղղությունները: Անդրադարձել է մշակույթի հասանելիության ապահովման նպատակով ՀՀ կառավարության կողմից իրականացված մի շարք միջոցառումների, այդ թվում՝ մշակույթի, ֆիզիկական, աշխարհագրական, տեղեկատվական, լեզվական մատչելիության ապահովմանն ուղղված ծրագրերին: Բարձր գնահատելով Հայաստան – միջազգային կառույցներ ակտիվ համագործակցությունը, նշվել է ՅՈՒՆԵՍԿՕ-ի կողմից «Երևանը՝ 2012 թ. գրքի համաշխարհային մայրաքաղաք» ծրագիրը: Հ. Պողոսյանը հնարավարություն է ունեցել ներկայացնելու 2013 թ. մայիսի 16-ից Եվրոպայի խորհրդում Հայաստանի վեցամսյա նախագահության շրջանակում իրակացվելիք միջոցառումները, մասնավորապես՝ Հայաստանում կայանալիք «Եվրոպական ժառանգության օրեր» ծրագրի ազգային համակարգողների տարեկան հավաքը և «Միջկրոնական երկխոսության» հարցերով միջազգային հանդիպումը:

Եվրոպայի խորհրդի անդամ երկրների մշակույթի նախարարների 10-րդ համագումարի արդյունքում ընդունվել է համատեղ հռչակագիր, որով ներկա պատվիրակությունների ղեկավարները, հիմք ընդունելով մարդու իրավունքների մասին համընդհանուր հռչակագրով և ընդունված իրավական այլ ակտերով սահմանված դրույթները, վերահաստատել են իրենց հանձնառությունը մարդու իրավունքների հիմնարար արժեքներին և ժողովրդավարությանը՝ մշակութային քաղաքականության շարունակական իրականացման համար:

Համաժողովի շրջանակներում Ռուսաստանի Դաշնության մշակույթի նախարար Վ. Մեդինսկու նախաձեռնությամբ՝ Բելառուսի, Ղազախստանի, Ադրբեջանի և Հայաստանի մշակույթի նախարարների առանձին հանդիպում է կազմակերպվել, որի ընթացքում քննարկվել է Հայրենական Մեծ պատերազմում տարած հաղթանակի 70-ամյա հոբելյանին նվիրված համատեղ միջոցառումների իրականացման հնարավորությունը: