Դերենիկ Դումանյանը՝ իր հնարավոր վերանշանակման մասին (տեսանյութ)

Ինչպես տեղեկացրել էր Լուրեր.com-ը, այսօր տեղի ունեցած ՀՀԿ խորհրդի նիստի ժամանակ, ՀՀԿ առաջնորդ, ՀՀ նախագահ Սերժ Սարգսյանը հայտնել է, որ Տիգրան Սարգսյանը կրկին կվերանշանակվի ՀՀ վարչապետի պաշտոնում։

Այս առնչությամբ 168.am-ը ՀՀ առողջապահության նախարար Դերենիկ Դումանյանից հետաքրքրվեց, թե կառավարության հինգ տարիների գործունեությունն ինչպե՞ս է գնահատում, արդյոք սխալներ թույլ չե՞ն տրվել գործադիր մարմնի աշխատանքներում, ինչին ի պատասխան նա նշեց. «Այդ սխալների մասին ավելի ճիշտ կլինի խոսի կառավարության ղեկավարը, երբ լինի վարչապետի հրամանագիրը: Կառավարության համապարփակ գնահատականը պետք է տան Հանրապետության ղեկավարն ու կառավարության ղեկավարը»:

Իսկ վարչապետի վերանշանակման մասին Դ. Դումանյանն ասաց. «Շատ լավ եմ վերաբերվում: Ես ևս կողմ եմ քվեարկել ու ցանկանում եմ, որ ապագա տարին Տիգրան Սարգսյանը ևս ղեկավարի կառավարությունը»:

Դերենիկ Դումանյանը հավաստիացրեց, թե չգիտի՝ արդյոք հավաստի՞ են լուրերը, թե ինքը շարունակելու է պաշտոնավարել ՀՀ առողջապահության նախարարի պաշտոնում, և հորդորեց. «Դուք ճշտեք»:

Հարցին, թե կցանկանա՞ք շարունակել պաշտոնավարել, Դ. Դումանյանը պատասխանեց. «Ցանկությունը քաղաքական կատեգորիա չէ»:

Իսկ հարցին, թե ո՞ւմ եք տեսնում Ձեր փոխարեն, Դ. Դումանյանը նախընտրեց չպատասխանել. նա միայն ժպտաց: