Նորաձևությունը, Տարոն Մարգարյանն ու «Elephant»-ի փղիկը

Նորաձևությունը, ինչպես հայտնի է, թելադրող է շատերի կյանքում: Հատկապես պճնամոլները սիրում են օր առաջ տեղեկանալ նորաձևության տենդենցներին և իրենց արտաքինը կազմակերպել դրանցում առկա իմպերատիվ նորմերին համապատասխան: Իհարկե, ժամանակին, երբ Կոկո Շանելը հեղափոխում էր մարդկանց գիտակցությունն ու արտաքին տեսքն իր ճաշակին ու գեղեցիկի իր ընկալումներին համապատասխան, նրա մտքով անգամ չէր կարող անցնել, թե կգա օրը, և հեռավոր Հայաստանում նույնիսկ քաղաքական գործընթացները կսկսեն կազմակերպել՝ հետևելով իր աշակերտների առաջադրած տենդենցներին:

Երևանի ավագանու խորհրդի ընտրություններին մասնակցող քաղաքական ուժերի մեջ ամենանորաձևը, ինչպես պարզվում է, առաջատար համարվող քաղաքական ուժն է՝ ՀՀԿ-ն: Հենց այս ուժն է որոշել ավագանու ընտրություններում համատեղել նորաձևությունն ու քաղաքականությունը:

Երբ քարոզարշավի հենց առաջին օրը Տարոն Մարգարյանի մեծադիր պաստառը հայտնվեց մայրաքաղաքի բոլոր հնարավոր ու անհնարին հատվածներում, շատերի մոտ տարակուսանք առաջացավ: Անգամ նույն թիմի որոշ ներկայացուցիչներ քմծիծաղ էին տալիս ու ասում, թե` «Elephant» մանկական խանութի գովազդն են վերցրել, միջից փղիկին հանել, Տարոնին են դրել»: Առաջին հայացքից, իհարկե, նմանությունն ավելի քան ակնհայտ է, թերևս, մի տարբերությամբ` դեղինն ու փղիկը ավելի էին իրար սազում, քան նույն դեղինն ու Տարոն Մարգարյանը:

Սակայն մի բան են հասարակ մահկանացուները, մի բան՝ շարքային քաղաքացիների սուբյեկտիվ գեղագիտական ընկալումները, մեկ այլ բան՝ պետության առաջատար քաղաքական ուժի ընտրությունների կազմակերպմամբ զբաղվող փիառշիկների հաշվարկները: Իսկ այդ հաշվարկները, ինչպես պարզվում է, բոլորովին էլ այդքան մակերեսային ու պարզունակ չեն, որքան կարող է թվալ առաջին հայացքից:
Այդպես, պարզվում է` դեղինը «Գարուն-Ամառ-2013»-ի ամենամոդայիկ գույներից է, և նորաձևության շատ տներ իրենց հավաքածուները ստեղծելիս առաջնորդվել են հենց այս գիտակցությամբ: Փիառշիկներն, ըստ երևույթին, Տարոն Մարգարյանին ներկայացրել են այս տարվա նորաձևության տենդենցները, քաղաքապետն էլ որոշել է իր ընտրողներին է՛լ ավելի դուր գալու համար ներկայանալ մոդայի վերջին շնչով:

Չի բացառվում, որ նման որոշման վրա լրջագույն ազդեցություն թողած լինի նաև Հայաստանի ամենաազդեցիկ կինը՝ առաջին տիկին Ռիտա Սարգսյանը, ով, «Ամուսնացած եմ նախագահի հետ» հայտնի ֆիլմում խոսելով ամուսնու` ինքնուրույնաբար սեփական արտաքինին հետևելու և բավական մեծ ուշադրություն դարձնելու հանգամանքի մասին, Սերժ Սարգսյանին իր հմայիչ ժպիտով անվանեց անգամ «ստիլյագա»: Անհնար է, որ Տարոն Մարգարյանն այս ֆիլմը դիտած չլինի, իսկ եթե դիտել է, բնականաբար, Առաջին տիկնոջ յուրաքանչյուր գնահատական, յուրաքանչյուր ակնարկ պետք է որ ընկալած ու յուրացրած լինի ինչպես հարկն է, հետևաբար, կարելի է ենթադրել, որ որպես երիտհանրապետական և հեռուն գնացող ամբիցիաներ ունեցող անձնավորություն՝ փորձել է հետ չմնալ իր ղեկավարից և ինքն էլ առաջին քայլերն անել «ստիլյագա» դառնալու ճանապարհին, ինչը, բնականաբար, պետք է միայն ողջունել, քանի որ միայն ճաշակով քաղաքապետը կարող է ճաշակով մայրաքաղաք հրամցնել իր համաքաղաքացիներին:

Լուսինե Կեսոյան