Հավատարիմ Սերժ Սարգսյանի ավանդույթներին

Վարչապետի անունն արդեն հայտնի է՝ Տիգրան Սարգսյան, ինչպես և սպասվում էր. ՀՀԿ ԳՄ նիստի ընթացքում Սերժ Սարգսյանը հայտարարեց ԱԳ նախարար Էդվարդ Նալբանդյանի ու Սերյան Օհանյանի՝ իրենց պաշտոններում մնալու և պաշտոնավարությունը շարունակելու մասին:

Եվ ահա, արդյունքում՝ դանդաղ, սակայն հաստատակամ քայլերով ՀՀԿ-ն Սերժ Սարգսյանի գլխավորությամբ ձևավորում է իշխանական թևը, որն էլ առաջիկա 5 տարիներին կփորձի հավատարիմ մնալ ստանձնած պարտավորություններին ու պարտականություններին: Մնացած նախարարների առումով Սերժ Սարգսյանը դեռևս ունի ժամանակ՝ որոշումներ կայացնելու, այսինքն՝ այս ֆոնի վրա առանձնանում է կենսունակությամբ, թերևս, ամենակարևոր հարցը՝ Երևանի ավագանու ընտրությունները:

Մինչև մայիսի 5-ը հաշված օրեր են մնացել, իսկ հաղթանակն այդ ընտրություններում Սերժ Սարգսյանի համար գերկարևոր խնդիր է դարձել` Հայաստանի կառավարման ֆուլ փաթեթն ապահովելու համար, եթե միայն հաշվի առնենք այն, որ Երևանը՝ որպես Հայաստանի կենտրոն և արդյունաբերական հիմնական կենտրոն, ձեռքից բաց թողնելը կդառնա իշխանասպանության պես մի բան: Տրամաբանական կլինի մտածել, որ Սերժ Սարգսյանը կգնա վա բանկ ամեն առումով, այսինքն՝ ժամանակին Գագիկ Ծառուկյանի գաղափարը՝ հաղթանակի համար անել ամեն ինչ, այսօր ՀՀԿ նախագահի կենսագործունեության ամենակարևոր ստիմուլներից է դարձել:

Այս առումով հանրապետական կուսակցությունը և Սերժ Սարգսյանը թերևս այլ բան չունեն անելու, քան այս փուլում իսկ մայիսի 5-ին բոլոր հնարավոր խնդիրները լուծել, այսինքն՝ այդ ուղղությամբ առաջին հերթին ՀՀԿ-ի գերխնդիրն է նախ քարոզչամեխանիզմների ճշգրիտ օգտագործումը, այնուհետև՝ մնացած թեկնածու կուսակցությունների՝ սև փիառով զբաղվելը. այս երկու գործառույթները բավականին հմտորեն այսօր ՀՀԿ-ականները իրականցնում են թե՛ իրական կյանքում, թե՛ վիրտուալում՝ սոցիալական ու լրատվական կայքերում:

Այս երկու գործառույթների՝ թերի կամ ուշացումով իրագործումն այլևս այդ բաղձալի հաղթանակին հասնելու հնարավորությունները ՀՀԿ-ի համար կնվազեցնի՝ իր հետևից թողնելով Սերժ Սարգսյանի համար ոչ ցանկալի հետևանքներ:

Այս առումով, իհարկե, ևս տարբերակներ ու մեխանիզմներ ՀՀԿ-ն անպայման իր դարանում ունի՝ ի դեմս նույն՝ ընտրատեղամասային արձանագրություններում հաղթանակում դոմինանտության օգտակար գործողության բարձր գործակցի, որը, գաղտնիք չէ, միշտ աշխատել է հօգուտ իշխանությունների թե՛ նախորդ տարվա խորհրդարանական ընտրությունների ընթացքում և թե՛ փետրվարի 18-ին կայացած նախագահականի ընթացքում:

Բացի այս, արդեն իսկ նկատվում է ընդհանրապես Հայաստանին՝ ընտրություններից առաջ բնորոշ հատկություն, այն է՝ մրցակիցների վրա ճնշում գործադրելու, կաշկանդելու ու դրանով իսկ խաղից դուրս թողնելու տարբերակ, որը, ինչպես ցույց տվեցին վերջերս կայացած նախագահական ընտրությունները, Հայաստանում գործում են գերմանական ճշգրտությամբ:

Ինչպես նախորդ անգամ, այս անգամ նույնպես թիրախային՝ վերը նշված դերում հայտնվել է «Բարգավաճ Հայաստան» կուսակցությունը՝ ի դեմս Գագիկ Ծառուկյանի. ինչպես փետրվարի 18-ին կայացած նախագահական ընտրությունների ժամանակ, այնպես էլ այժմ այն կազմակերպությունները, որոնցում ԲՀԿ նախագահը բաժնեմաս ունի, ենթարկվում են ստուգումների: Չնայած նրան, որ այս գործընթացը ԲՀԿ-ականները մեկնաբանում են որպես բնականոն գործընթաց, այնուամենայնիվ, այն, որ միայն ընտրություններից ընտրություններ են այդ գործընթացները իրականացվում, համենայն դեպս՝ դրանց մասին միայն այդ իրավիճակներում են խոսում, առիթ է տալիս եզրակացնելու, որ սա նպատակաուղղված քայլ է Երևանի ավագանու ընտրություններում մրցակցին կաշկանդելու համար: Մյուս կողմից՝ սա նաև հնարավորություն է Գագիկ Խաչատրյանի՝ ՊԵԿ նախագահի համար նոր կառավարության կազմում վաստակել իր տեղը:

Այսպիսով՝ ստացվում է, որ այն մեթոդները, որոնք կիրառվել են Հայաստանում ընտրություններից առաջ, և որոնք ամեն անգամ  դրական արդյունք են տվել, այս անգամ ևս գտել են իրենց կիրառման թիրախային խմբին կամ խմբերին՝ ի դեմս ԲՀԿ-ի, որը լուրջ հայտ է ներկայացնում Երևանի ավագանու ընտրություններում հաղթանակի հասնելու համար գոնե միայն հետընտրական պրոցեսներում ՝ընտրատեղամասային արձանագրությունների վերահսկման տեսակետից: Ստացվում է, որ Սերժ Սարգսյանը, հավատարիմ մնալով ավանդույթներին, հերթական անգամ հանրությանը ներկայացնում է այլընտրանքի բացակայության թեորեմի ճշմարտացիությունը, որը հենց ինքը Սերժ Սարգսյանը բազմիցս ապացուցել է:

Գևորգ Ավետիսյան