Մենք ունեցել ենք 3 նախագահ, 3-ն էլ ծառայել են այս համակարգին. Արմեն Ռուստամյան

Այսօր՝ ապրիլի 19-ին, Անի հյուրանոցում «Ժառանգություն» կուսակցության կողմից հրավիրված համաժողովին ԱԺ ՀՅԴ խմբակցության պատգամավոր Արմեն Ռուստամյանն ասաց. «Մեր երկրում մենք չենք ուզում արյուն թափել, մենք պարտավոր ենք թույլ չտալ՝ մեր լավ չմտածված քայլերի արդյունքում մեր ժողովրդի արյունը թափվի: Սա տքնաջան աշխատանք է, բայց ոչ մի հեշտ ճանապարհ չկա, որ հասնենք մեր նպատակին: Մենք պետք է կարողանանք մեր ազգին պատրաստել տևական պայքարի մշակույթին, բոլոր ժամանակներում ժողովուրդները հաջողության են հասել այդ կերպ: Ոչ մի քաղաքական ուժ, եթե ժողովրդի հետ չէ, ուրեմն շահագրգռված չէ ծառայել ժողովրդին:

Մեր նպատակը իշխանությունը ժողովրդին վերադարձնելն է, մենք դրան պետք է գնանք հստակ հանգրվանային ճանապարհով, այստեղ ճիշտ ասվեց՝ 5 տարի այսպես մնալ չի կարելի: Ես համոզված ասում եմ՝ պատճառների պատճառը պետք է վերացվի՝ այս համակարգը պետք է փոխվի: Մենք ունեցել ենք 3 նախագահ, 3-ն էլ ծառայել են այս համակարգին, պետք է հրաժարվենք այս համակարգից,-ասաց Արմեն Ռուստամյանը

Վերջինիս խոսքով՝ կարևոր է, որ արագ անցում կատարվի խորհրդարանական համակարգին, վերջ տրվի խայտառակ մեծամասնական համակարգին, ընդդիմության համար լծակներ լինեն ընտրությունները վերահսկելու համար:

«Ոչ մի շարժում Հայաստանում սահուն չի եղել, և ես շատ ուրախ եմ հենց այն սկզբունքով առաջ գնալ, ինչն ասաց Րաֆֆի Հովհանիսյանը՝ 7 չափել, մեկ կտրել, բայց մենք պետք է միասին 7-ը չափենք և կտրենք:

Նշենք, որ Արմեն Ռուստամյանի ելույթի ժամանակ ներկաները բարձրաձայնում էին «Մի՛-ա՛-ցո՛ւմ»: