Կոտայքի մարզպետը խառնվել է Երևանի ավագանու ընտրություններին

Երեկ «Հայկական ժամանակը» ահազանգ ստացավ, որ Կոտայքի մարզպետ Կովալենկո Շահգալդյանի հրահանգով մարզպետարանի ենթակայությամբ գործող պետական հիմնարկների ղեկավարների առջև պահանջ է դրվել՝ կոլեկտիվի անդամներից հավաքել մայրաքաղաքում ապրող իրենց այն ծանոթ-բարեկամների տվյալները, որոնք կպարտավորվեն Երևանի ավագանու ընտրություններում քվեարկել Հանրապետական կուսակցության օգտին: Խոսքը վերաբերում է մասնավորապես դպրոցներին: Թերթի տեղեկություններով, կոլեկտիվի անդամներից պահանջում են այդ տվյալները ու միաժամանակ զգուշացնում, թե զանգահարելու են ցուցակում նշված երևանցիների հեռախոսահամարներով՝ անձամբ նրանցից հաստատում ստանալու, որ պատրաստվում են ընտրել Հանրապետական կուսակցությանը:

Երեկ «ՀԺ» թղթակիցը պատահական ընտրությամբ զանգահարել է Աբովյան քաղաքի դպրոցներից մեկը, որը մարզպետարանի ենթակայության է: Ասել է, որ մարզպետարանի աշխատակից է և հետաքրքրվել է ցուցակների ճակատագրով: Տնօրենի (դպրոցի համարն ու տնօրենի անունը թերթը միտումնավոր չի նշում) հետ զրույցը ներկայացվում է ստորև:

- Ցուցակներ պիտի պատրաստեիք չէ՞ ավագանու ընտրությոնների հետ կապված, ուզում եմ հարցնել՝ ի՞նչ փուլում է:

- (Տևական լոություն-խմբ): Ինչո՞ւ եք դպրոցներին հարցնում: Դուք ո՞վ եք, կասեք:

- Ուղղակի ինձ հանձնարարել են, որ ճշտեմ, տեսնեմ՝ հիմա ի՞նչ ընթացքի մեջ է, հերթով զանգում եմ:

- Ցուցակները տվել ենք արդեն:

- Ե՞րբ եք տվել, ո՞ւմ:

- Շուտ ենք տվել օրը չեմ կարող հիշել, բայց մի քանի օր առաջ էր:

- Ո՞ւմ եք տվել:

- Ով մեզ հանձնարարել է:

- Կրթության բաժի՞ն եք ներկայացրել:

- ՉԷ, կրթության բաժինը չի հանձնարարել:

- Իսկ քանի՞ հոգու անուն կար ձեր ցուցակում... Նույն ցուցակի մասին ենք, չէ՞ խոսում, Երևանի ավագանու ընտրությունների հետ կապված՝ բարեկամների, ծանոթների ցուցակի:

- Հա:

- Իսկ անուն կարող եք նշել, ո՞ւմ եք տվել:

- Դե հիմա ես չգիտեմ ճիշտն ասած, դուք ով եք: Ով ինձանից պահանջել է, նրան էլ տվել եմ:

Նշենք, որ այս երևույթը համատարած բնույթ ունի: ՀՀԿ-ն վարչական ողջ ռեսուրսը, այդ թվում և մարզերում, ներդրել է մայիսի 5-ի ընտրություններում իրենց թեկնածուի և ցուցակի օգտին ձայներ ապահովելու գործին: Մարզպետարաններին իջեցված հրահանգն այնուամենայնիվ այնքան էլ արդյունավետ չէ: Երևանում բնակվող և մարզային հիմնարկությունում աշխատող բարեկամ ունեցող քաղաքացիներից մեկը թերթին ներկայացրեց ցուցակի շուրջ իրենց զրույցը:

«Զանգեց, ասեց, ինձ պետք ա օգնես, թե չէ գործից կհանեն, ցուցակ են ուզել, հեռախոսի համարներով: Զանգելու են, ստուգեն: Ես էլ ասեցի, մեր անունն ու հեռախոսի համարը գրի, տասը հոգու անուն ու հեռախոսի համար էլ կտամ: Որ զանգեն, կասեմ՝ ընտրելու եմ, բայց ձեռքս կոտրվի՝ ես ՀՀԿ չեմ ընտրի»,- փոխանցեց քաղաքացին, ավելացնելով բա ինչ անեի, չէի թողնի չէ, որ խեղճին աշխատանքից ազատեն: