Ողբերգական ավտովթար Արարատի մարզում. կա 3 զոհ, 3 վիրավոր

Ինչպես հայտնում է shamshyan.com-ը, Երևան-Մեղրի ավտոճանապարհի Ճահճի ոլորաններից դեպի Տիգրանաշեն գյուղ տանող ավտոճանապարհին Mercedes մակնիշի 30 ՍՍ 723 համարանիշի ավտոմեքենայի վարորդը դուրս է եկել ճանապարհի երթևեկելի գուտուց և մոտ 150 մետր գլորվել ձորը:

Ըստ նախնական տեղեկությունների, կա 3 զոհ, 3 վիրավոր: Դեպքի վայր են ժամանում Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ գումարտակի հրամանատար Սուրեն Խուդոյանի, վաշտի հրամանատար Տիգրան Գրիգորյանի և դասակի հրամանատար Սանասար Հարությունյանի գլխավորությամբ:

Ժամանում են նաև ՀՀ Արտակարգ իրավիճակների նախարարության փրկարար ծառայության Արարատի մարզի հրշեջ-փրկարարական ծառայության աշխատակիցները:

Մահացածներին և վիրավորներին առաջինը օգնություն են ցուցաբերել քաղաքացիները: Տեղում են նաև ոստիկանության Արարատի մարզային վարչության և Արարատի ոստիկանության բաժնի օպերատիվ-քննչական խմբերը և մեծ թվով բժիշկներ:

Փրկարարները քաղաքացիների և ճանապարհային ոստիկանության աշխատակիցների հետ միասին դիերը դուրս են բերում ձորից:

Այս պահին ոստիկանությունը պարզում է մահացածների և վիրավորների ինքնությունը: