Պարզվել է այսօր Արարատի մարզում ողբերգական ավտովթարի հետևանքով մահացածների և վիրավորների ինքնությունը (լուսանկարներ)

Ինչպես հայտնում է Shamshyan.com-ը, ոստիկանության քննչական գլխավոր վարչության Արարատի մարզի քննչական բաժնում հարուցվել է քրեական գործ ՀՀ քրօրի 242 հոդվածի 3-րդ մասի (ճանապարհային երթևեկության և տրանսպորտային միջոցների շահագործման կանոնների խախտելը, որն ազգուշությամբ առաջացրել է 2 կամ ավելի մարդու մահ) հատկանիշներով։

Ինչպես հայտնում է ֆոտոլրագրող Գագիկ Շամշյանը, նշված քրեական գործը հարուցվել է այսօր՝ ապրիլի 21-ին՝ ժամը 17։00-ի սահմաններում, Երևան-Մեղրի ավտոճանապարհի Տիգրանաշեն գյուղի տարածքում՝ Քյարքիի ոլորաններում, տեղի ունեցած ողբերգական ավտովթարի փաստով։

Ինչպես ավելի վաղ հայտնել էր ֆոտոլրագրողը, Mercedes մակնիշի 30 ՍՍ 723 համարանիշի ավտոմեքենայի վարորդը դուրս էր եկել ճանապարհի եթևեկելի գոտուց և մոտ 150 մետր գլորվել ձորը։ Վթարի հետևանքով ավտոմեքենայի ուղևորներ, 57-ամյա Սվետլանա Ալեքսանյանը, 42-ամյա Գագիկ Առուստամյանը տեղում մահացել են, և մինչ դեպքի վայր կժամանեին ՀՀ Արտակարգ իրավիճակների նախարարության փրկարար ծառայության Արարատի մարզի փրկարական վարչության աշխատակիցները և թիվ 26 հրշեջ-փրկարարական ջոկատը, Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները և ոստիկանության Արարատի մարզային վարչության և ոստիկանության Արարատի բաժնի աշխատողները քաղաքացիների օգնությամբ ձորից դուրս են բերվել ավտոմեքենայի վարորդ, 58-ամյա Ժորա Առուստամյանը, ուղևորներ, 3-ամյա Բարմեն Առուստամյանը, որոնք շտապօգնության մեքենաներով տեղափոխվել են Արտաշատ քաղաքի բժշկական կենտրոն, իսկ 37-ամյա Նարինե Ազարյանը՝ Արարատ քաղաքի բժշկական կենտրոն։

Ֆոտոլրագրողը հայտնում է, որ 11-ամյա Էլեոնորա Առուստամյանը հոսպիտալացման ճանապարհին մահացել է։

Դեպքի վայր են ժամանել Ճանապարհային ոստիկանության 2-րդ սպայական գումարտակի հրամանատար Սուրեն Խուդոյանը, նույն գումարտակի 1-ին վաշտի հրամանատար Տիգրան Գրիգորյանը և նույն վաշտի 2-րդ դասակի հրամանատար Սանասար Գրիգորյանը։

Մահացածների դիերը դուրս բերելու ժամանակ տեղում էին նաև Ոստիկանության քննչական գլխավոր վարչության ն Արարատի մարզի քննչական բաժնի քննիչները:

Ֆոտոլրագրողը հայտնում է, որ մահացածները ու վիրավորները Լեռնային Ղարաբաղի Հանրապետության Մարտակերտի շրջանի Պողոսագոմեր գյուղից են։

Լուսանկարները՝ Գագիկ Շամշյանի