«Փեսես ու ես». «Բենթլին» ընդդեմ նախագահականի «24»-ի

ՀՀԿ գործադիր մարմնի, խորհրդի նիստերն ուշագրավ են ոչ միայն դրանց մասնակցող նախագահ-վարչապետ-պատգամավոր-նախարար-մարզպետ-թաղապետերով, այլև նրանց փոխադրամիջոցներով: Քանի որ ՀՀԿ նիստը ՀՀԿ-ականի համար տոնի պես մի բան է, մասնակիցներից շատերը՝ հատկապես նրանք, որ միջոցառմանը մոտենում են հենց որպես տոնի, ներկայանում են ոչ միայն տոնական հանդերձանքով, այլև տոնական կամ թեկուզ եղած-չեղածի մեջ՝ առավելագույն տոնական համարումն ունեցող փոխադրամիջոցով:

Այդպես, արդեն տևական ժամանակ Հայաստան մուտք գործած շքեղագույն ավտոմեքենաներին, հնարավոր և անհնար բոլոր մակնիշներին ու «գոլդ» պետհամարանիշներին կարելի է ականատես լինել հենց այս նիստերին: Իհարկե, յուրաքանչյուր նիստ այս առումով, երևի թե, եզակի է, յուրաքանչյուր նիստի, երևի թե, մեր «էլիտարները» ներկայանում են հենց այդ օրվա համար առավել նախընտրելի համարված ավտոմեքենայով, սակայն հաշվի առնելով այն, որ առաջին անգամ էի ՀՀԿ նիստի ժամանակ անցնում Մելիք-Ադամյանով, ՀՀԿ նիստերի թոփ-տասնյակներ կազմելու, համեմատականներ անցկացնելու իրավունքը թողնելով այնտեղ մշտապես ներկա գտնվող գործընկերներիս՝ ներկայացնեմ այսօրվա նիստի յուրահատուկ դրվագները: Եվ որքան էլ զարմանալի թվա՝ օրվա դափնիներն ուղևորվում են միևնույն «ընտանեկան օջախ»:

Երեկոյան ժամը 7-ից վերնախավը մտնում էր Մելիք-Ադամյան: Ոմանք նախընտրել էին նախապես մոտակա մի տեղ դիրքավորվել, հետո միայն գնալ նիստի. օրինակ՝ Սյունիքի մարզպետ Սուրիկ Խաչատրյանն (Լիսկա) ու Արարատի մարզպետ Էդիկ Բարսեղյանը (Լոնդիկ) դուրս եկան «Մարիոթ»–ից, միացան իրենց սպասող Գագիկ Աբրահամյանին (Բրիլյանտ Գագո) և հենց այդպես՝ հետիոտնի կարգավիճակով էլ շարժվեցին դեպի ՀՀԿ գրասենյակ. երկու մարզպետներն էլ գտնվում են վտանգավոր գոտում, երկուսն էլ պաշտոնանկ արվողների շարքում են, այնպես որ չի բացառվում, որ սա ընդամենն «ապագա գահընկեցների»՝ անպաշտոն, «անպադավատ» գոյությանը հարմարվելու փորձ էր:

Հետիոտների հետ ՀՀԿ գրասենյակ էին մտնում նաև մայրաքաղաքում ազատ քայլելու հաճույքից զրկվածները (սա, իհարկե, տարբեր պատճառներով. ոմանք երես չունեն՝ հասարակ ժողովրդի աչքին երևալու, ոմանք՝ իրենց և պլեբսի՝ նույն տարածքում գտնվելու հավանականությանը վերաբերվում են որպես աշխարհի վերջի պես մի բան, ոմանք՝ պարզապես սեփական քաշի ծանրության տակ դժվարանում են անգամ տեղում կանգնած մնալ, ուր մնաց թե՝ մի երկու քայլ անեն առանց ավտոմեքենայի). մեքենան կայանվում էր գրասենյակի մուտքի մոտ, տերը դուրս էր գալիս միջից, անմիջապես մտնում ներս կամ միանում դրսում կանգնածներին:

19:20 Մելիք-Ադամյան մտավ նախագահական ավտոշարասյունը և վայրկյանների ընթացքում անհետացավ ՀՀԿ նորակառույց գրասենյակի խորխորատներում: Նախագահը եկել էր, բոլորը սկսեցին ներս մտնել: Հենց այդ ժամանակ էլ ՀՀԿ գրասենյակի մոտ կանգ առավ այսօրվա նիստի մասնակիցների փոխադրամիջոցների շարքում իր գոյությամբ մարտահրավերի պես մի բան ընկալված փոխադրամիջոցը. «Գազ-24 Վոլգան» ոչ այլ ինչ էր, եթե ոչ «անճոռնի ճուտիկ»: «Էս ով ա՞»,- զարմացած վրա բերեցին անգամ լրագրողները՝ հանկարծակիի գալով արտառոց ավտոմեքենայի հայտնությունից:

Դռները բացվեցին և միջից դուրս եկան Կորյուն Նահապետյանն ու շենգավիթցի պատգամավոր Արաիկ Հովհաննիսյանը՝ երկուսն էլ, այսպես ասած, «ռաբատյագ» պատգամավորների իմիջի ձգտողներ: Հետո արդեն ավտոմեքենայի զննությունից պարզվեց, որ «ռաբատյագ» տղերքը այդքան էլ «ռաբատյագ» փոխադրամիջոց չէին ընտրել. ԱԺ պետհամարանիշներ ունեցող և արտասահմանյան ավտոմեքենա վարող պատգամավորները նախընտրել էին տոնական նիստին ներկայանալ «ՍՍ» պետհամարանիշներ կրող փոխադրամիջոցով: Իսկ թե որտեղի՞ց էին մեր օրենսդիրները նման փոխադրամիջոց «կպցրել», արդեն այլ հարց է: Եթե իհարկե, հենց նոր նախագահ Սերժ Սարգսյանի հետ անձնական հանդիպումից չէին գալիս, որին՝ որպես սրբազան ուխտի, ոտքով էին գնացել և որից հետո նախագահը խղճացել էր տղերքին և հանձնարարել նախագահականի ավտոմեքենաներից մեկով իջեցնել ՀՀԿ գրասենյակ:

Հազիվ էր ՀՀԿ նիստի ամենաօրիգինալ փոխադրամիջոցը հեռացել, տեսադաշտը բացել, երբ հանկարծ գրասենյակի մուտքի մոտ կայանեց մի շքեղաշուք, պսպղացող, շողացող, իր գեղեցկությամբ բոլորին կուրացնող ճեփ-ճերմակ «Բենթլի» մակնիշի «երկաթե նժույգ»: Դռները բացվեցին և, այո՛, իհա՛րկե, նման ավտոմեքենա վայել է միայն Հայաստանի թիվ մեկ օլիգարխին. տերը Սամվել Ալեքսանյանն էր, ով իր ավտոմեքենան նստելու պատվին էր արժանացրել նաև իր տիրույթները «թաղապետի կարգավիճակով կառավարող» Դավիթ Օհանյանին: «Երկաթե նժույգի» ասպետն իջավ ավտոմեքենայից, ցուցադրեց նաև սպիտակ կոստյումը, տոնական ժպիտով նաև ողջույններ շռայլեց չորս կողմն ու շարժվեց վարչապետ «նշանակելու»…

Լուսինե Կեսոյան