Թռչնագրիպի պատճառով արգելվել է Չինաստանից մի շարք ապրանքների ներմուծումը Հայաստան

ՀՀ ԳՆ սննդամթերքի անվտանգության պետական ծառայությունը Հայաստանի Հանրապետությունում իրացվող թռչնամսի նկատմամբ իրականացնում է լայնածավալ վերահսկողական միջոցառումներ սննդամթերքի շղթայի բոլոր փուլերում:

2013 թվականին Ծառայության պետի համապատասխան հրամաններով դիտարկում և ստուգում է իրականացվել «Գրիգ Էլ Մետ» ՍՊԸ-ում: Փաստաթղթային նույնականացման ընթացքում ուսումնասիրված փաստաթղթերի հիման վրա ընկերության կողմից արտադրված «Գետամեջ» ապրանքանիշի ամբողջ արտադրանքը (շուրջ 80 տոննա) արտադրողի կողմից բաժանվել է թվով 31 խմբաքանակի: Ամբողջ արտադրանքն առանձին հաշվառվել և պահվել է, միաժամանակ Ծառայության պետի համապատասխան որոշմամբ արգելվել է դրանց իրացումը և հանվել շրջանառությունից: Ծառայության մասնագետների հանձնարարությամբ և անմիջական մասնակցությամբ յուրաքանչյուր խմբաքանակից կատարվել է նմուշառում և ներկայացվել լաբորատոր փորձաքննության: Փորձաքննության արդյունքներով վտանգավոր ճանաչված խմբաքանակը ոչնչացվել է, իսկ մնացած մասերի լաբորատոր հետազոտությունները շարունակվում են, և յուրաքանչյուր խմբաքանակի անվտանգությունը փորձաքննության արդյունքում հիմնավորվելու պարագայում կթույլատրվի հետագա իրացումը՝ օրենքով և այլ իրավական ակտերով սահմանված պահանջներին համապատասխանելու դեպքում:

ՀՀ ԳՆ սննդամթերքի անվտանգության պետական ծառայության պետի մեկ այլ հրամանով իրականացված դիտարկման ընթացքում կատարվել են նմուշառումներ 2012թ. օգոստոսի արտադրության «Սադիա» և 2012թ. սեպտեմբերի արտադրության «Ֆրանգոսուլ» (DOUX)» ապրանքանիշի սառեցված հավերից և ներկայացվել լաբորատոր փորձաքննության: Լաբորատոր փորձաքննության արդյունքում տվյալ խմբաքանակների «Սադիա» և «Ֆրանգոսուլ» (DOUX)» ապրանքանիշի սառեցված հավերում արձանագրվել է աճի խթանիչների՝ սահմանված թույլատրելի քանակի շեղում: Ծառայության առաջադրանքով հայտնաբերված խմբաքանակները ներմուծող տնտեսավարող սուբյեկտի կողմից հետ են կանչվել շուկայից և ոչնչացվել, որի արդյունքում բացառվել է դրանց հետագա իրացումը:

Իրացման կետերում առկա «Սադիա» հավերի 2012 թվականի մայիս, հունիս, հուլիս, սեպտեմբեր, հոկտեմբեր, նոյեմբեր ամիսների արտադրության խմբաքանակները ճանաչվել են առողջության համար անվտանգ:

Սննդամթերքի հետ կապված հնարավոր վտանգի ներթափանցումը և տարածումը կանխելու նպատակով հանձնարարվել է Ծառայության կազմում գործող սահմանային հսկիչ կետերին՝ «Սադիա» և «Ֆրանգոսուլ» (DOUX)» ապրանքանիշի սառեցված հավերի ներմուծման ժամանակ՝ անկախ ներմուծվող սննդամթերքի ռիսկայնությունը որոշող չափանիշների հիման վրա գնահատման արդյունքից և ուղեկցող փաստաթղթերի առկայությունից, կատարել նմուշառում՝ լաբորատոր փորձաքննությամբ ներմուծվող բեռի անվտանգությունը որոշելու համար:

Ծառայության կողմից նաև ձեռնարկվել են միջոցառումներ վարակիչ հիվանդությունների ներթափանցումն ու տարածումը կանխելու համար: Այլ երկրներից Հայաստանի Հանրապետության տարածք կարանտինային, հատուկ վտանգավոր և պարտադիր ծանուցման կենդանիների ինֆեկցիոն հիվանդությունների, մասնավորապես՝ Չինաստանի Ժողովրդական Հանրապետության տարածքում արձանագրված թռչնի գրիպ (H7N9 տիպի) հիվանդության ներթափանցումը Հայաստանի Հանրապետության տարածք կանխելու նպատակով ծառայության պետի հրամանով արգելվել է Չինաստանի Ժողովրդական Հանրապետությունից Հայաստանի Հանրապետության տարածք կենդանի թռչնի, բոլոր տեսակի թռչնամթերքի, ապրանքային և ինկուբացիոն ձվի, մսոսկրային ալյուրի, կերերի, լրացակերերի, պոլիմերային և ստվարաթղթե պալարային տուփերի և միջադիրների ներմուծումը՝ մինչև կարանտինի չեղյալ հայտարարելը:

ՀՀ ԳՆ սննդամթերքի անվտանգության պետական ծառայությունը, որպես սննդամթերքի անվտանգության բնագավառում պետական կառավարման լիազոր մարմին, իրականացրել և շարունակում է իրագործել իր առջև դրված նպատակներն ու խնդիրները՝ Հայաստանի Հանրապետության օրենսդրությամբ վերապահված իր լիազորությունների սահմաններում ապահովելով անվտանգ սննդամթերքի ներմուծումը, արտադրությունը և շուկայահանումը Հայաստանի Հանրապետությունում: Ծառայությունը կոչված է իրականացնելու պետական վերահսկողություն սննդամթերքի անվտանգության բնագավառը կարգավորող օրենքների և այլ իրավական ակտերի պահանջների պահպանման և կատարման նկատմամբ, ինչպես նաև հանրությանը սպառնացող վտանգի դեպքում միայն իրազեկելու դրա վերաբերյալ, այլ ոչ թե գովաբանելու կամ վարկաբեկելու սննդի շղթայում գործառույթներ իրականացնող տնտեսավարող սուբյեկտներին: