Մեկնարկեց «Հայերենն իմ սրտում է» համահայկական երիտասարդական համաժողովը

Ապրիլի 22-ին մեկնարկեց ՀՀ սփյուռքի նախարարության «Հայերենն իմ սրտում է» համահայկական երիտասարդական համաժողովը, որին մասնակցում է շուրջ 500 երիտասարդ՝ աշխարհի 30 երկրից:

Բացման խոսքում ՀՀ սփյուռքի նախարարի պաշտոնակատար Հրանուշ Հակոբյանը՝ նշեց,- «Այսօր տոն է Հայրենիքում, աշխարհի տարբեր ծայրերից ժամանած հայ երիտասարդները հավաքվել են քննարկելու համազգային կարևորության խնդիրներ և փորձելու են նոր ուղիներ առաջարկել Հայոց ցեղասպանության միջազգային ճանաչման, դատապարտման ու հետևանքների վերացման, Արցախյան հիմնահարցի խաղաղ կարգավորման, լեզվի և մշակույթի պահպանման խնդիրներում: Հայերենն է լինելու աշխարհի տարբեր ծայրերում հայի տեսակը պահպանելու մեր զենքը: Խորհրդանշական է, որ համաժողովն անցկացվում է Հայոց ցեղասպանության տարելիցի նախօրեին: Վաղը ձեր ջահերով երթը պետք է լինի ուխտ՝ հայերենը պահպանելու, ձեր ազգային ոգին ու ինքնությունը պահպանելու զորավոր ուխտ»:

Այնուհետև Հ. Հակոբյանն ընթերցեց ՀՀ Նախագահ Սերժ Սարգսյանի ուղերձը համաժողովի մասնակիցներին: Համաշխարհնայցման գործընթացներում 21-րդ դարի մարտահրավերներին դիմակայելու համար ՀՀ Նախագահը համաժողովի մասնակիցներին կոչ արեց պահպանել ազգային ինքնությունը, որի կարևոր առհավատչյան մայրենի լեզվով հաղորդակցվելն է:

Ընթերցվեցին Ն.Ս.Օ.Տ.Տ Գարեգին Բ Ամենայն Հայոց Կաթողիկոսի հայրապետական օրհնանքը, ԼՂՀ Նախագահ Բակո Սահակյանի ուղերձը, Համաշխարհային հայկական կոնգրեսի և Ռուսաստանի հայերի միության նախագահ Արա Աբրահամյանի ողջույնի խոսքը:

ՀՀ վարչապետ Տիգրան Սարգսյանն իր ելույթում մասնավորապես նշեց. «Մեր ուժը մեր միասնության մեջ է», «…Լեզուն է, որ միավորելու և մեկ բռունցք է դարձնելու հայությանը: Այն հայ ինքնության կարևորագույն առանցքն է: Մեր ազգի հուսալի ապագան և շարժիչ ուժը երիտասարդությունն է, և երիտասարդական այս համաժողովը ՀՀ սփյուռքի նախարարության համահայկական կարևորագույն ծրագրերից է…»:

Ելույթներով հանդես եկան մի շարք գերատեսչությունների ղեկավարներ և ներկայացուցիչներ, համաժողովի մասնակից սփյուռքահայ երիտասարդներ: Վերջիններս իրենց մասնակցությունը համաժողովին համարում են միմյանց ճանաչելու, համազգային նշանակության հիմնահարցերը համատեղ քննարկելու, Հայրենիքից նոր, զորավոր ազդակներ ստանալու հրաշալի հնարավորություն:

Համաժողովը շարունակում է աշխատանքները:

Ապրիլի 23-ին Հայաստանի երիտասարդական հիմնադրամի սրահներում կծավալվեն «Երիտասարդության հիմնախնդիրները», «Լեզվամշակութային հիմնախնդիրներ» և «Հայոց ցեղասպանության 100-րդ տարելիցին ընդառաջ» խորագրերով թեմատիկ քննարկումներ: