Սյունիքի մարզպետի՝ իր պաշտոնում մնալու գաղտնիքը

Ապրիլի 15-ի դրությամբ, Հայաստանում աշխատավարձի պարտքը դարձել է 78,2 միլիոն դրամ: Արարատը, Լոռին, Կոտայքը, Վայոց ձորն ու Տավուշը պարտքեր չունեն: Արմավիրում 11 միլիոն դրամ պարտքը դարձել է 8,3 միլիոն: Եթե Սյունիքը մարտի 15-ին պարտք չուներ, ապա մեկ ամիս անց' ապրիլի 15-ին, ունի մոտ 7 միլիոն դրամ աշխատավարձի պարտք:

Դեռևս 2009 թվականին Հայաստանի կառավարությունը մշակել է ՀՀ մարզպետների գործունեության գնահատման չափորոշիչներ:

Դրանք են՝ համայնքի բյուջեի կատարումը, մարզպետներին վերապահված վերահսկողական լիազորությունների լիարժեքությունը, մարզպետների կողմից տնտեսական զարգացման աջակցության մակարդակը, գյուղատնտեսության բնագավառում կատարված աշխատանքները, ոչ պետական միջոցներով սոցիալական ենթակառուցվածքների ոլորտում իրականացված աշխատանքները և այլն: Մարզպետներն առավելագույնը 100 միավոր կարող են հավաքել:

Մինչև 60 միավորը գնահատվում է անբավարար, 60-85-ը՝ բավարար, 85-ից բարձրը՝ լավ: Այս չափորոշիչների համաձայն, Սյունիքի մարզպետն ակնհայտորեն թերանում է: Բայց ՀՀ մարզպետների գործունեության գնահատման չափորոշիչները մեզանում քաղաքական են. փետրվարի 18-ին' ՀՀ նախագահի ընտրությունում, Սյունիքում Սերժ Սարգսյանը հաղթել է Րաֆֆի Հովհաննիսյանին: Եվ Սյունիքի մարզպետի՝ իր պաշտոնում մնալու գաղտնիքը հենց դա է: