Դպրոցները՝ ավելի պաշտպանված ու պատրաստված

Այսօր ՀՀ ԱԻ նախարարությունում տեղի ունեցավ Եվրոպական հանձնաժողովի Մարդասիրական օգնության և քաղաքացիական պաշտպանության հարցերով գլխավոր վարչության (ԴԻՊԵԿՈ) կողմից ֆինանսավորվող Աղետների ռիսկերի կառավարման տարածաշրջանային ծրագրի հայաստանյան բաղադրիչի Համակարգող հանձնաժողովի նիստը: Ծրագրում ներգրավված են ՀՀ ԱԻ և ԿԳ նախարարությունները, ՄԱԿ-ի մանկական հիմնադրամը, Հայկական Կարմիր խաչի ընկերությունը, Աղետների ռիսկերի նվազեցման ազգային պլատֆորմը (ԱՌՆԱՊ), ՕՔՍՖԱՄ և «Սեյվ դը չիլդրեն ինթերնեյշնլ» կազմակերպությունները:

Հանդիպման նպատակն էր ներկայացնել և քննարկել ԴԻՊԵԿՈ-ի ծրագրի շրջանակներում իրականացված աշխատանքները՝ 2013 թ. առաջին եռամսյակում:

Ողջույնի խոսքում ԱԻ փոխնախարար Հ. Մխիթարյանը մասնավորապես ասաց. «Հուլիսին կլրանա այս ծրագրի մեկ տարին: Դպրոցներում աղետների ռիսկերի նվազեցումից բացի՝ մենք մոտ մեկ տասնյակից ավելի ծրագրեր ունենք: Եթե Սպիտակի երկրաշարժի ժամանակ մենք պատրաստված լինեինք, ապա դպրոցներում այդքան զոհեր չէին լինի: Դպրոցներն ԱՌՆ առումով մեծ նշանակություն ունեն: Աշակերտները պետք է ավելի պատրաստված լինեն աղետներին, քանի որ նրանք մեր հասարակության ամենախոցելի խավերից են»:

Նիստի օրակարգի հարցերի քննարկման ընթացքում ներկայացվեցին ԴԻՊԵԿՈ-ի ծրագրի շրջանակներում իրականացվող մի շարք ծրագրերի՝ 2013 թ. հունվար-մարտ ամիսների ընթացքում կատարված աշխատանքների արդյունքները:

ՄԱԿ-ի մանկական հիմնադրամի «Աջակցություն Հարավային Կովկասի խոցելի համայնքներում և հաստատություններում աղետների ռիսկերի նվազեցմանը» ծրագրի նպատակն է նպաստել բնական աղետների նկատմամբ խոցելի համայնքների դիմակայման բարձրացմանը և համայնքների ու երեխաների խոցելիության նվազեցմանը։

«Սեյվ դե չիլդրեն ինթերնեյշնլ» կազմակերպության «Ներառական աղետների ռիսկի նվազեցման» ծրագրի շրջանակներում վերապատրաստվել է մոտ 900 մանկավարժ՝ 21 հաստատություններից։

Հայկական Կարմիր խաչի «Կառուցենք անվտանգ տեղական համայնքներ Հարավային Կովկասում» ծրագրի կազմակերպիչները Շիրակի մարզում հիմնել են կամավորական թիմեր՝ աղետի դեպքում առաջին օգնության համար։

ՕՔՍՖԱՄ-ի «Աջակցություն Հարավային Կովկասում համայնքների դիմակայունությանն աղետների նկատմամբ» ծրագրի շնորհիվ Վայոց ձորի մարզի 10 գյուղական համայնքների դպրոցներին տրամադրվել են հակահրդեհային, առաջին օգնության և ազդարարման միջոցներ:

Խոսելով ԱՌՆ գլոբալ պլատֆորմում Հայաստանի մասնակցության մասին՝ ՀՀ ԱԻՆ ՓԾ տնօրենի տեղակալ Ն. Գրիգորյանը հայտնեց, որ պլատֆորմի շրջանակներում հայկական կողմը մի շարք կարևոր հանդիպումներ է ունենալու, որոնք ավելի կնպաստեն Հայաստանում ԱՌՆ ոլորտի զարգացմանը:

Նիստի ավարտին Տ. Թովմասյանը ներկայացրեց դպրոցներում աղետների պատրաստվածության և ռիսկերի մեղմացմանն ուղղված սարքավորումների ու պարագաների ցանկը՝ նշելով, որ ՄԱԿ-ի մանկական հիմնադրամը կփորձի հնարավորինս շատ դպրոցների ապահովել նման գույքով։

Ամփոփելով հանդիպումը՝ Հ. Մխիթարյանը նշեց. «Մենք նոր թափ ենք հավաքում, բայց անելիքներ դեռ շատ կան: Պետք է լուրջ ուշադրություն դարձնել տարհանմանն ու ուսուցիչների պատրաստմանը: Շատ կարևոր է, որպեսզի նման ծրագրերում ներգրավվեն բոլոր դպրոցները»: