Ilur.am-ը ստո՞ւմ է

Ilur.am լրատվական կայքը այսօր հրապարակել է «Mediamall.am-ը ապահովում է Տարոն Մարգարյանի էջի լայքերը» վերնագրով հոդվածը, որում գրված է, որ բազմաթիվ մարդիկ իրենցից անկախ դարձել են Տարոն Մարգարյանի ֆեյսբուքյան էջի երկրպագուները՝ ընդամենը այցելելով Mediamall.am, որից հետո այդ մարդկանց անուններն ավելացել են Տարոն Մարգարյանի՝ «Ավելի լավ Երևան» ֆեյսբուքյան էջի հավանողների թվում: Որպես իբրև թե ապացույց ներկայացված է տեսանյութ:

Նախ ուզում եմ նշել, որ Ilur.am կայքի լրագրողը ցուցաբերել է անբերեխիղճ և ոչ պրոֆեսիոնալ մոտեցում՝ նախապես կապ չհաստատելով Mediamall.am-ի խմբագրության հետ և չստանալով պարզաբանում, արդյունքում գրելով միակողմանի նյութ՝ բացարձակապես զուրկ օբյեկտիվությունից: Նման գործելաոճը բնորոշ է խիստ սակավաթիվ այցելություններ ունեցող կայքերին, որոնք ընկնում են սենսացիաների հետևից, որպեսզի ամեն գնով այցելություններ ապահովեն:

Կապ հաստատելու որևէ փորձ չի եղել: Նյութը հրապարակվելուց հետո միայն ես զանգահարել եմ Ilur.am-ի խմբագրին, ով ասել է, որ կարող են հրապարակել նաև մեր կողմից տրամադրվող հերքումը:

Ամենայն պատասխանատվությամբ հայտարարում եմ, որ Mediamall.am-ը որևէ կապ չունի Տարոն Մարգարյանի ֆեյսբուքյան էջի հետ, երբեք չի համագործակցել և չի համագործակցում Տարոն Մարգարյանի հետ (եթե հետևեք կայքի Top News բաժնի քաղաքականությանը, ապա ավելի քան պարզ կերևա, որ Տարոն Մարգարյանին քննադատող այդքան նյութեր տեղադրող կայքը պարզապես չէր կարող համագործակցել նրա հետ, դա առնվազն զավեշտալի է), և մենք հետամուտ ենք լինելու, որ պարզենք, թե որտեղից են եկել նման տեղեկությունները: Mediamall.am կայքի տեխնիկական սպասարկումն իրականացնող ընկերության ներկայացուցիչ Սուրեն Սարգսյանը հեռախոսազրույցում հաստատել է, որ Ilur.am կայքի տարածած տեղեկությունները սուտ են, իսկ ներկայացվող իբրև թե ապացույցները՝ անհիմն:

Այդ պատճառով մենք հրավիրում ենք բաց քննարկման բոլոր կողմերին՝ Ilur.am կայքի խմբագրին և ներկայացուցիչներին, նաև Mediamall.am-ի տեխնիկական սպասարկումն իրականացնող և տեխնիկական անվտանգությունը երաշխավորող ընկերության ներկայացուցիչներին: Քննարկմանը ներկա կլինեն համապատասխան մասնագետներ: Առաջարկում ենք ներկայացնել բոլոր ապացույցները, և համատեղ քննարկման արդյունքում մասնագետների օգնությամբ պարզել, թե որքանով են իրականությանը համապատասխանում Ilur.am կայքի կողմից տարածված տեղեկությունները: Եթե պարզվի, որ ապացույցներ չկան կամ դրանք հիմնավոր չեն, Mediamall.am-ը զրպարտության համար դատարան հայցադիմում կներկայացնի՝ ի դեմ Ilur.am կայքի:

Սպասում եմ Ilur.am կայքի արձագանքին, որից հետո կհամաձայնեցնենք հանդիպումը և քննարկումը կազմակերպելու ժամանակը:

Հ.Գ. Ներկայացնում ենք նաև տեսանյութ, որում ցույց ենք տալիս, որ Ilur.am կայքում տեղադրված տեսանյութի նման հոլովակներ կարելի է պատրաստել ցանկացած կայքի մասին՝ առանց որևէ դժվարության, ուստի՝ միայն տեսանյութը հիմք հանդիսանալ չի կարող: Նշեմ, որ ստորև ներկայացվող տեսանյութը չի համապատսխանում իրականությանը, պատրաստվել է մեր կողմից՝ ընդամենը ցույց տալու համար, որ նման վարկաբեկող տեսանյութեր պատրաստելը զուտ րոպեների խնդիր է:

Կարեն Վարդանյան

Mediamall.am-ի գլխավոր խմբագիր