ԱՄՆ-ի Ֆրեզնո շրջանը ճանաչել է Լեռնային Ղարաբաղի անկախությունը

ԱՄՆ-ի Կալիֆորնիա նահանգի Ֆրեզնո շրջանը ապրիլի 23-ին ճանաչել է Լեռնային Ղարաբաղի անկախությունը: Ինչպես հայտնում է Ամերիկայի Հայ դատի հանձնախումբը, շրջանի Հոգաբարձուների խորհուրդը ապրիլի 23-ին բանաձև է ընդունել, որի հեղինակը Անդրեաս Բորգեասն է. մեջբերում է REGNUM-ը:

Համաձայն ընդունված բանաձևի՝ Ֆրեզնոն պաշտոնապես ճանաչում է Լեռնային Ղարաբաղի Հանրապետության անկախությունը որպես պատմականորեն էթնիկ հայերով բնակեցված տարածք, որը գտնվում է Հայաստանի և Ադրբեջանի միջև:

Բացի այդ, բանաձևը կոչ է անում Կալիֆորնիա նահանգի օրենսդիր մարմնին պաշտոնապես ճանաչել Լեռնային Ղարաբաղը:

ԱՄՆ-ում Լեռնային Ղարաբաղի մշտական ներկայացուցիչ Ռոբերտ Ավետիսյանը շնորհակալություն է հայտնել ընդունված բանաձևի համար՝ նշելով. «Մենք շնորհակալ ենք այս նախաձեռնության համար և հուսով ենք, որ ընդունված բանաձևն ավելի խոր համագործակցության հիմք կհանդիսանա մեր տարածաշրջանում կայունության, ժողովրդավարության և տնտեսական ճանապարհին»:

Իր հերթին Լոս Անջելեսում Հայաստանի գլխավոր հյուպատոս Գրիգոր Հովհաննիսյանը նշել է, որ Լեռնային Ղարաբաղի անկախությունը ճանաչելուն ուղղված այս քայլը կարևոր նախաձեռնություն է Հարավային Կովկասում խաղաղության հաստատման համար:

Նախաձեռնության հեղինակ Բորգեասն ասել է, թե ինքը հույս է հայտնում, որ Ղարաբաղի անկախության ճանաչման գործընթացն ԱՄՆ-ում կշարունակվի առանձին շրջանների մակարդակով:

«Ես հուսով եմ, որ Սակրամենտո շրջանը նույնպես կճանաչի Լեռնային Ղարաբաղի անկախությունը: Չնայած, որ Ֆրեզնոն առաջինը ընդունեց նման բանաձևը, մենք հուսով ենք, որ դա ոգևորիչ քայլ կհանդիսանա այլ շրջանների համար: Մեր վերջնական նպատակն է, որ Վաշինգտոնը հետևի մեր օրինակին»,-ասել է Բորգեասը: