Թուրքիան չի կարողանում թոթափել անցյալի բեռը. ուկրաինացի քաղաքագետ

Ուկրաինական Analitika.at.ua լրատվական կայքին տված հարցազրույցի ժամանակ ուկրաինացի քաղաքագետ Միխայիլ Բելեցկին անդրադարձել է Թուրքիայում Հայոց ցեղասպանությանը, նշելով, որ եթե 98 տարի առաջ ժամանակակից Թուրքիան ճանաչեր և դատապարտեր հայերի զանգվածային հրեշավոր սպանդը, ապա իր խղճից կթոթափեր անցյալի բեռը և այժմ հանգիստ շունչ կքաշեր:

«Ղրիմի խորհրդարանին ներկայացրած թուրքական խորհդարանի խոսնակ Ջեմիլ Չիչեկի պահանջը՝ օրակարգից հանել Հայոց ցեղասպանության ճանաչման որոշումը, վկայում է 2 բանի մասին,-նշում է քաղաքագետը,- նախ՝ Ուկրաինայի հանդեպ Թուրքիայի վերաբերմունքն է որպես թույլ պետություն, ում հետ կարելի է խոսել սպառնալիքի և վերջնագրերի լեզվով: Դժվար է պատկերացնել, որ Թուրքիան հրապարակայնորեն իրեն նման բան թույլ տար Ռուսաստանի կամ ԱՄՆ-ի այն նահանգների նկատմամբ, որոնք ճանաչել են Հայոց ցեղասպանությունը: Այնտեղ նա առնվազն կգործեր «քողարկված դիվանագիտության» օրենքներով:

Եվ երկրորդ կետը, որն ավելի ընդհանրական բնույթի է, այն է, որ Թուրքիան չի կարողանում թոթափել անցյալի բեռը, ինչը վնասում է նրա հեղինակությանը ոչ միայն միջազգային ոլորտում, այլև թունավորում է մթնոլորտն իր բուն երկրում: Ինչպես առանձին մարդու կողմից կատարած սպանությունը, որը թունավորում է մարդու հոգեկան վիճակը, և նա այլևս չի կարողանում վերադառնալ նորմալ կյանքին մինչև չխոստովանի իր մեղքը, այնպես էլ ողջ թուրք ազգը, ում անունից կատարվել է այդ հրեշավոր հանցագործությունը, չի կարողանում այլևս նորմալ ապրել և լռել այդ մասին: Դա շատ լավ գիտակցեց գերմանացի ժողովուրդը, որը ճանաչեց և դատապարտեց 2-րդ համաշխարհային պատերազմի ժամանակ նացիստների ոճրագործությունները խաղաղ բնակչության նկատմամբ: Եվ Թուրքիան, ճանաչելով Հայոց ցեղասպանությունը, կթոթափեր անցյալի բեռը և հանգիստ խղճով կշնչեր ազատ: Թուրքիայում քիչ չեն մարդիկ, ովքեր գիտակցում են դա և արդեն իրենք բարձրաձայնում են այդ մասին: Կարելի է չկասկածել, որ կգա օրը, երբ Թուրքիան այլընտրանք չի ունենա, քան ճանաչել 98 տարի առաջ գործած Ցեղասպանությունը, սակայն ցավոք սրտի, ներկայիս Թուրքիայի իշխանությունները, ինչպես նաև՝ բնակչության զգալի հատվածը, դեռևս պատրաստ չեն դրան»,-եզրափակել է Բելեցկին: