ԲՀԿ-ն ակնկալում է ոստիկանապետի հստակ արձագանքը Գ. Ծառուկյանի և ոստիկանի միջև առաջացած միջադեպի առթիվ

Այսօր Ծիծեռնակաբերդի հուշահամալիր էին այցելել ԱԺ ԲՀԿ խմբակցության ներկայացուցիչները՝ Գագիկ Ծառուկյանի գլխավորությամբ: Նրանք ծաղիկներ դրեցին 1.5 մլն անմեղ զոհերի հուշահամալիրին, որից հետո ԱԺ ԲՀԿ խմբակցության ղեկավար Գագիկ Ծառուկյանը, դուրս գալով հուշահամալիրից, փորձեց միանգամից գնալ դեպի իր մեքենայի կայանատեղին: Սակայն նրան թույլ չեն տվել այդ ճանապարհով իջնել, ասելով, որ կարող են իջնել միայն ներքևի ճանապարհով:

Lurer.com-ի թղթակցի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանն ասաց. «Ես դա կանվանեի իր պարտականությունները կատարող ոստիկանին ոչ վայել պահվածք: Պարոն Ծառուկյանն իր երեխայի, խմբակցության պատգամավորների հետ 1,5 մլն անմեղ զոհերի հուշակոթողին ծաղիկներ դնելուց հետո փորձեց վերադառնալ իր մեքենայի կայանատեղի, սակայն ոստիկանը միջամտեց: Ես ուզում եմ պարզապես մտածել, որ ուղղակի ոստիկանը պատկերացում չուներ՝ ով է իր դիմաց կանգնած, և փորձեց գերազանցել իր լիազորությունները: Պարոն Ծառուկյանը կարող էր օգտվել անվտանգության խորհրդի անդամի, ԲՀԿ խմբակցության ղեկավարի իր լիազորությունից և հստակ պատասխան տալ, բայց ուղղակիորեն պարոն Ծառուկյանն ինքը կանխեց:

Իհարկե, խմբակցության պատգամավորները պատրաստ էին հստակ արձագանքել, բայց պարոն Ծառուկյանն ինքը կանխեց աղմուկը: Մենք ակնկալում ենք ոստիկանության պետի հստակ արձագանքը տվյալ փոխգնդապետի պահվածքի վերաբերյալ»: